今朝碌社交平台，得知今日原來係達明一派第一張EP《達明一派》誕生40周年紀念；但我第一張聽嘅達明一派唱片，係1987年嘅《石頭記》，一聽鍾情後，便努力儲零用錢買返《達明一派》及《達明一派II》盒帶。
《達明一派》EP四首歌入面，最多人認識當然係《繼續追尋》。當年睇《年青人周報》，有樂評文章形容此作似Ultravox嘅《Love's Great Adventure》；後來聽返，當然分辦得到兩首歌其實不盡相同，相信文章作者因為兩歌歌名有啲相似而穿鑿附會而已。不過年少無知未聽英文歌嘅我，第一次聽到《繼續追尋》係震撼嘅，尤其尾段長長電子純音樂演奏，放諸80年代Cantopop主力Sell旋律同Vocal，《繼續追尋》嘅曲式係非常罕有。
《模特兒》就擺明向德國電子先鋒Kraftwerk名作《The Model》參考 / 致敬。同屬非常電嘅曲式，自己鍾意呢首多過《繼續追尋》，副歌仲有一把神秘女聲和唱，Credit寫係陳秀萍，但此後佢無再出現過喺達明任何作品；之前有網友懷疑佢其實係何秀萍，希望日後有機會希望能問問達哥或明哥，解開我呢個多年謎團。
我最鍾意EP入面B side第一首《惑星》。當年嘅我歌齡尚淺，但覺得呢首歌氣氛好靚，特別係長達1分鐘嘅純音樂Intro，奇怪地完全唔覺悶，覺得同一般廣東流行情歌好唔同，我嘅音樂鑑賞能力，亦慢慢開始識得分析更多。
《愛的作弄》可能係四首歌之中最普通，但我發現佢彷如達明後來一曲《盡在今夜》嘅淺白版，無論編曲同歌詞上，算係一個幾有趣嘅對比。記憶中多年來達明無喺現場玩過《愛的作弄》Live，相信日後都唔會再有機會。
90年代之後，我嘅聽歌媒體由盒帶過渡至CD，好自然買返晒達明所有舊作CD版，但《達明一派》EP一直無出返獨立復刻版本（其他Remix EP都係）；後來有幸喺黑膠尚未Revival之前，喺鴨寮街以極低價購入一批達明黑膠，包括《達明一派I》，而家應該升值唔少。不過我呢隻EP，以至其他達明黑膠、CD、盒帶、VCD、DVD……相信我呢一世都唔會將佢哋放賣，永遠只屬我一人擁有，亦無人可以喺我個腦入面，刪走佢哋。
