唔知道呢度仲有無有人記得台灣獨立樂隊「壞女兒」？ 無論大家仲記唔記得佢哋，佢哋鐵定今個暑假會復出演出。
暫時我知道係咁多。而我對壞女兒嘅記憶，係由二十四年前嘅暑假開始，嗰一日，我嚟到台北Tower Records，睇佢哋、薄荷葉同其他好幾隊台灣Indie Band演出，呢次活動應該係「小白兔唱片」 搞嘅（當年叫「小白兔橘子唱片」）。
嗰陣時，我成日去台灣，認識咗小白兔橘子嘅KK，成為咗廠牌嘅Fans。壞女兒同樣喺二十四年嘅暑假推出處女專輯《沒有毛的熊》，我第一時間擁有，然後每日不停聽啊聽，聽到完全入迷入腦。二十四年後今天，你叫我喺腦入面馬上播放佢哋碟內歌曲《天使》、《登登等》、《Cm Dream》、《飄》……等等，我腦入面轉一轉，馬上同你按下Play制。
仲有後來嘅《小太陽》專輯，亦係當年嘅CD唱盤常客，記得當年阿松曾同我分享，話呢張碟幾好聽，特別係《酸菇》；我自己就最鍾意《我有我的小太陽》及《一個人的啤酒》。但出完呢張專輯後無耐，壞女兒好似解散，有點無疾而終嘅感覺。嗰陣時，我亦都少咗機會去台灣。
今日要重新同大家推介壞女兒，好似有啲難度。喺串流音樂當道今天，壞女兒嘅歌曲，暫時仍未正式放上串流平台，但總算可以喺Youtube聽返。亦有樂迷將樂隊當年Live片段放上網，同知音人分享。
同壞女兒出道嘅年代相比，今日要接觸唔同音樂，實在容易得多，幾近無成本。但唔知係咪因為太容易，大家太容易粗略聽完後覺得唔太啱Feel便Skip。就算係OK好聽嘅，最多只會Save低喺Music Library入面，之後有時間先再聽啦。
呢種聆聽新音樂嘅模式，其實無所謂好咗或差咗；但最大唔同嘅係，我哋嘅耐性的確比以前短得多。好多台灣朋友都話，每次嚟香港，都發現我哋嘅步伐好急速，今日嘅網絡文化何嘗唔係？如此大環境下，要搵到自己真正喜愛嘅樂隊及音樂人，方法就同以前年代一樣，需要啲耐性，仲要專注，最好自己親自去搵，而唔好淨係大平台餵數據俾你。
但我相信，無論喺邊一個年代聽到壞女兒，我都會鍾意佢哋，每晚Loop著《沒有毛的熊》陪我入眠或失眠，期待佢哋推出新專輯《小太陽》。我仲會睇佢哋嘅Live，除了去Tower Records，亦會去地下社會及音樂節睇。時光飛逝，一下子由2002年嚟到2026年，壞女兒最新一場Live，會喺今年8月舉行。
