80年代謎一樣傳奇樂隊「楊將軍之苦茶」，自從2021年復出後，斷斷續續有新作推出，去年更一度宣佈參與Clockenflap音樂節，可惜因成員健康問題而退出，未能夠同My Bloody Valentine同場演出，當然屬人生一大遺憾吧。
不過就如The Verve講過，Life's not a rehersal，人生從來不容綵排，過去發生咗嘅事，已唔能夠改變，唯有好好活在當下，先可以活出自己嘅未來。
好似好老土不過嘅人生大道理，不過楊將軍之苦茶歷經好幾個年代變遷，由停頓近30年到近年復出重組，其後再遇上波折，但主腦Patrick對音樂熱誠一直無變，及一直有所堅持；由佢喺新歌《Digital Karma》中唱出AI新時代嘅憂慮、我哋每個人點樣被數碼科技牢牢控制著而不自知，呢份大道理覺悟，值得大家拎出智能手機開著串流平台細心聆聽，然後放下手機，好好細想歌曲背後意思。
《Digital Karma》歌名早已開門見山道出歌曲原意，開場嘅電結他掃撥，以及成員Annie負責嘅合成器效果，既有80s英倫Indie Band味道，亦有啲似90s迷幻嘅Spiritualized，代表著昔日簡單而美好嘅年代。Patrick筆下歌詞描寫大數據操控已無所不在，我哋嘅情緒亦不知不覺被佢牽拌著，不能自已；歌曲中段嘅編曲漸變複雜，電結他亦更Noisy，代表著今日嘈吵而失焦嘅時代。最後我哋要嘗試「Face to face / Soul to soul」，才能重掌原本屬於自己嘅控制權。
《Digital Karma》講嘅道理，其實好多人都知道，只不過每次望住手機，便再次身不由己。我一直強調，所有數碼科技，從來就係一個強大Database，如果好好善用，會為我哋帶嚟好多好處及方便，正如我不時會上網搜尋一啲早已失傳或鮮為人知嘅歌手樂隊，雖然相關內容唔多，但每次搵到新嘅資訊或網友留言，我都會逐一細閱，好好Bookmark甚或儲存低，我擔心呢啲資訊有一日會隨時消失。
今日嘅數碼科技，除咗係一個強大Database，更強大係背後支撐住佢嘅演算法，每日不停猜你喜歡、推介你有興趣嘅內容，其實大部份都係廣告，如果唔係，點會有足夠收益，令這個強大Database持續運作？
數碼科技大時代，唔會因為一兩個清醒嘅人而停落嚟，而必需群眾都有自省能力，先可以改變佢嘅演算法、停止劣幣驅逐良幣嘅大趨勢，一切皆為因果。我曾構想過一本科幻小說結局，最後一幕係主角帶領全世界人類，將已被外星人病毒侵佔嘅智能手機掉進大海裡，象徵人類重生。不過現實中，呢一幕肯定唔會出現，因為會被人話污染海洋哈哈哈。
《Digital Karma》（2026）
