最近大家紛紛懷念即將結業嘅「精美唱片」；其實過去咁多年，已有無數唱片店執笠，對無乜點聽歌嘅朋友嚟講，其實無乜特別感覺，或者會「哦」一聲，多一間唔多，少一間唔少。
「精美唱片」所在嘅佐敦區，以及旺角區，曾有大量唱片店進據，係我年輕時最常前往買CD嘅地方——注意係CD唔係黑膠，因為當年屋企無黑膠唱盤。
要講旺角唱片店，直接以CD命名嘅「香港雷射唱片交易所」（ CD交易所），絕對係其中一間大家最掛住嘅名字，入面有好多好多回憶，隨住店舖於2017年結業，部份或已隨年月淡忘，不過仍有部份記憶猶新。
CD交易所位於當年旺角最潮嘅信和中心，選址地庫一層其中一個角落位置。每次我搭扶手電梯落到地庫，通常會第一時間轉左轉右轉左再直行，先到「CD交易所」逛逛，睇下有無平價二手CD值得入手。
印象中嘅CD交易所，地方非常蚊型，三邊牆掛滿一排排CD櫃，入面放滿一張張CD；大部份時間都擠滿人群，但大家又會十分禮讓，掃完一排就會自動轉位，讓俾旁邊師兄師姐上前接力尋寶。如果當年有Go Pro攝影機，拍下店內人來人往搵碟嘅Time-lapse，畫面應該會幾有趣。
長駐店長Carl，感覺比較Cool，加上本人屬I人，未試過同佢傾偈及交流音樂，大家只係買家同賣家嘅關係；當然有時候彼此身份會調轉，我都試過將唔聽嘅CD放售，而佢哋收購價屬合理水平。
90年代正價全新CD，一般售價約90元，而「CD交易所」嘅二手CD，平均價約為50元，低見30元，亦有部份貨式屬新出無耐即放售，又或從未開封，高位售價可達70元，仍比全新一手平約20元；特別版、日本版、絕版等另計。
當年未有互聯網，自然更沒有Carousell，造就CD交易所成為其時二手CD交易龍頭。其實信和地庫同層仲有另一間更大型嘅二手店，但我都係鍾意去CD交易所做交易，全因唱片Collection較多英文碟，容易搵到心頭好筍碟。
記憶中自己喺CD交易所最成功收購，第1位係浮世繪《愛花的少年》頭版CD；我購入時樂隊已散Band，開始有炒賣價值，當時以200元購入，係覺得有啲揦脷，但事後證明完全值回碟價兼有凸，由年輕聽到中年，碟肉已有少少發霉，至今仍然係我CD機常客。
第2位係Felt嘅精選《Abolute Classic Masterpieces》，二手價好似只需50元，屬低價盤，其時初聽英文歌已久仰Felt大名，慕名購入後，聽咗一兩次後發覺平淡如白開水，便放底無理佢。兩年後拎返嚟重聽，開始有Feel，自此Felt成為我人生最愛樂隊之一。原來CD好比紅酒，有時需要放置一段日子，多一點時間和耐心，才能聽出味道。今天，呢張《Abolute Classic Masterpieces》在我心中，早已升值連城。
CD交易所另一回憶點，少不了由另一位店長陳行手寫嘅黃紙仔樂評，貼喺重點推介嘅CD封套上，小小一張黃紙內密麻麻寫滿一行行文字，當中不少屬Japan ＆ related嘅作品，我自己亦曾喺佢哋度以筍價買過一張Japan精選《Souvenir From Japan》，以及The Dolphin Brothers嘅《Catch The Fall》……
如果再講落去，我嘅CD交易所Shopping List應該有一匹布咁長，再加上信和中心其他唱片店嘅前世今世故事；商場亦見證住香港嘅動漫文化、遊戲機電玩歷史、偶像相片Yes Card炒賣、不能說的三仔四仔秘密……足夠寫成一篇探討香港流行文化嘅長篇學術論文，你要加入女權主義亦無不可。
不過我呢篇文章野心不大，只希望大家讀後，記得香港曾有過一間充滿獨特個性嘅二手唱片店，以及回想返當年曾喺呢度買過 / 賣過邊啲唱片，已經好足夠。
CD交易所嘅Facebook Page仍然健在，不時出Post，值得大家Follow。最新一篇談及David Sylvian明年推出新作，店主對Japan嘅愛，確係至死不渝。
最後，雖然遲咗兩年先知道，但我會睇返陳行編劇嘅《查無此人》。
我嘅CD交易所Shopping List（節錄）：
浮世繪《愛花的少年》
達明一派《神經》
蘇永康《Mini So》
Felt《Abolute Classic Masterpieces》
Japan《Souvenir From Japan》
The Dolphin Brothers《Catch The Fall》
The Beloved《It's Alright Now》
Brighter《Laurel》
Depeche Mode《Music For the Masses》
Weekend《La Varieté》
