香港金像獎後天便舉行，可惜頒獎禮並沒有「最佳紀錄片」獎項，不然《香港四徑大步走》一定會奪獎；不過電影仍告入圍「最佳剪接」及「新晉導演」（註︰最終獲得「新晉導演」一獎）。
又如果，《香港四徑大步走》有份入圍「最佳電影」，我認為它絕對值得當選。
由Robin Lee執導的《香港四徑大步走》，自去年年尾開始公映，獲得大量好評；口耳相傳下，吸引不少人爭相購票入場。絕大部份評論及觀後感，皆離不開「挑戰極限」、「燃燒生命」、「熱血」、「大癲」等等；片中亦用上不少航拍鏡，拍下香港四徑壯麗一面。香港真係好靚。看完之後，大家是否還記得我們說過：「我哋真係好撚鍾意香港」？
《香港四徑大步走》主角為「香港四徑超級挑戰」，是一項參加者必需在60小時內完成298公里的超級黐線越野跑賽事。單看以上規則，對我這類平均每公里都要跑8分鐘以上的超低Level跑友而言，「四徑」絕對是難以想像的超高Level挑戰。
所以一開始看《香港四徑大步走》，確實佩服一班參賽者用盡心機訓練及做好賽前分析，以及眾人全心全意投入的意志，如何將自己體能推到最極致。不過亦好老實講，我等凡人實難以投入其中，只能夠喺外圍邊皮為佢哋打氣，因為自己真係做唔到。好比世榮打鼓，永遠都去唔到John McEntire嘅Level。刻薄啲講，世榮同John，根本係兩個世界嘅人。
但最後，《香港四徑大步走》仍然觸動到我。電影喺2021年Covid時期拍攝，那是一個跑手必需戴口罩參賽嘅荒謬年代；睇完之後，卻不禁令我回想起九七年前嘅遙遠香港，那個我曾經熟悉嘅華洋共處嘅香港。那個年代，外國精英當道，但華人到後來仍可力爭上游。如果你都經歷過那個年代，你一定明白我在說甚麼。
好嘅電影，或好嘅藝術作品，係可以超越藝術本身，帶領受眾站喺更高位置，睇得更遼遠，感受到作品賦予我哋嘅時代意義。就憑這一點，《香港四徑大步走》足以當選2024年我心目中最佳電影。
