（原文喺2002年《mcb》刊登，現改為粵文版本，並稍作修改）
當聽到New Order「全新」細碟《Wold In Motion》背面一首清風送爽嘅《Such A Good Thing時，我個心笑咗出嚟；《World In Motion》嘅No Alla Violenza Mix同樣嚟得輕盈簡潔，但我腦裡不斷播放住嘅，始終都係佢嘅原版Single Mix。
12年前，New Order同英格蘭國家足球隊合作以England New Order名義，發表呢首1990年世界盃英格蘭官方打氣歌《World In Motion》，順利登上細碟榜No.1，成為新秩序第一首，亦係唯一一首冠軍作。《World In Motion》嘅MV，每一幕畫面，相信我呢一世都唔會忘記：班尼斯甩咀Rappin'、加士居尼表情鬼馬手多多、麥馬漢一臉正經「的波」……仲有華度用佢嘅魔法左腳喺意大利左後防發難……結尾係新秩序及英格蘭足球隊大合唱場面。12年前第一次聽到呢首歌嘅感動，好比今屆（2002年）世界盃初賽中英格蘭以1比0、22年嚟首次擊敗宿敵阿根廷，同樣令我永遠難忘。
可能你永遠唔會明白我呢篇細碟碟評想講乜。直至一天，當你同樣戀上英倫音樂及英倫足球，先能夠了解《World In Motion》喺我心入面嘅特殊地位。
