（原文喺2003年《mcb》刊登，現改為粵文版本，並稍作修改）
時間真係好奇妙，佢可以沖淡一切，亦可以令細水長流。
時間永遠唔會停落嚟，但隨住時間流逝，漸漸你會開始發現，原來呢個世界上，真係有啲嘢，可以係永遠都唔會變，你好有信心咁講。
「Saint Etienne仲有新作推出？」「有啊，啱啱出咗新碟《Finisterre》，已經係佢哋第6張專輯。」「你仲有聽佢哋？你真係長情。」呢句說話，唔知係讚美，定係諷刺？
無錯，對好多人嚟講，Saint Etienne的確係已過氣名字。數數手指，由佢哋1991年處女專輯《Foxbase Alpha》到呢張《Finisterre》，唔經唔覺已有11年時間，連手指都唔夠數。但好奇怪，面對10年人事，我竟然一啲唏噓慨嘆都無，唔似我一貫筆觸！
起初由Pete Wiggs同Bob Stanley組成嘅Saint Etienne，自從請嚟Sarah Cracknell喺佢哋早期細碟《Nothing Can Stop Us Now》負責Vocal後，呢個兩男一女「嬲」字陣容一直維持至今未變過，實在非常難能可貴，特別當身邊所有人同事都不斷地咁轉，我發現除咗我自己之外，總算仲有Saint Etienne繼續留守喺呢度。你話，我點捨得唏噓？我開心都嚟唔切！
音樂上，Saint Etienne亦從未曾令我失望。由早期《Foxbase Alpha》同《So Tough》結合Indie-Dance同Northen Soul風格、《Good Humour》嘅瑞典味道、《The Sound Of Water》嘅冷冷電子，每一次佢哋都有唔同面貌呈現。雖然然Saint Etienne喺一般傳媒眼中嘅新聞價值越嚟越低，但同音樂水準無任何必然關係。呢個世界上，有幾多出色音樂被人忽略埋沒？所以我應該慶幸，咁多年嚟，Saint Etienne仍然繼續努力創作高質素流行曲，而每當收到佢哋最新消息，我總會無比興奮，因為佢哋從未輕言離我而去 。
我知道咁講似乎有啲自大。但我好想話俾你知，Saint Etienne對我嚟講，永遠都係特別嘅，全因為《Hobart Paving》呢首歌，同《Tiger Bay》呢張專輯。我應該點樣讚美《Tiger Bay》呢張完美唱片好呢？佢集合電子、古典、跳舞音樂、民謠等元素於一身，感覺卻非常一氣呵成，散佈喺每首樂曲每個段落之中，嗰份精雕細琢唯美嘅感覺，更令《Tiger Bay》成為有史以嚟最美麗嘅折衷唱片，沒有之一！
至於《Hobart Paving》，曾有位朋友同我講，從來無諗過我會鍾意咁樣嘅歌，既然我會鍾意一首咁美好嘅歌，我未必注定係個「唔開心嘅人」啩？唔通喺我最深最深潛意識入面，從來都唔會希望歌曲中咁靚嘅畫面，有天降臨我身上？朋友仲話，就算人生畢竟都係苦嘅多，但如果因為生存喺世上先有機會聽到《Hobart Paving》，都不枉做人一場……
朋友講嘅都啱。我成日都會為聽到一首美妙嘅歌而開心，事後諗返，發覺自己竟在意呢啲微不足道嘅事情，便覺得自己好渺小，但我又唔能夠否認呢一啲快樂嘅存在，所以我一直好多謝Saint Etienne，佢哋嘅音樂永遠都咁年青、美麗，雖然我存活喺一個自設嘅令人沮喪嘅渺小世界中，但佢哋已俾到我所能擁有嘅最大快樂。
其實自從《Tiger Bay》高峰後，我覺得Saint Etienne開始以隨心所欲嘅心態去製作唱片，風格路向亦越見多元化，但仍難掩佢哋音樂背後嘅美感。上張搵嚟To Rococco Rot同Sean O' Hagan合作嘅《The Sound Of Water》已係一個好例子，透過冰冷電子聲效散發柔和暖意。不過，全新專輯《Finisterre》又係另一回事。今次佢哋請嚟唔少客席樂手參與，仲有男演員Michael Jayston演繹歌曲之間嘅間場讀白。2002年嘅Saint Etienne，為我哋帶嚟一張集合樂隊多年精髓風格嘅優秀專輯。
聽住細碟作《Action》，的確有啲似昔日《He's On The Phone》嘅流麗跳舞音樂氣息，大碟版本嘅節奏更經重新混音。《Shower Scene》同《The Way We Live Now》更完全重拾Indie-Dance嘅乾脆俐落，好自然令人隨歌起舞。但《Amateur》、《New Thing》同《B92》呢3首Eletro-Pop作品，會唔會令你以為Saint Etienne趕緊Electroklash熱潮？咪住，其實早喺《Tiger Bay》時期，佢哋已帶嚟《Like A Motorway》呢首徹頭徹尾80年代嘅電子流行曲！
越聽《Finisterre》，越覺得佢係一張Saint Etienne嘅「新曲精選」── 以全新歌曲演繹佢哋以往嘅音樂。《The More You Know》就好似《The Sound Of Water》時期嘅冰冷電子編曲，連Sarah都唱得好神秘。《Summerisle》明亮嘅電子節拍、《Stop And Think It Over》非常60年代嘅甜美旋律，以及純音樂《Language Lab》清風送爽嘅長笛吹奏，正正係咁多年嚟Saint Etienne獨門嘅輕盈電子音樂風格，絕對只此一家。呢3首作品同樣都有The Doves成員Jez Williams客串彈結他。
自從《So Tough》專輯中嘅《Calico》之後，今次Saint Etienne再送上另一首Rappin'作品《Soft Like Me》，由女Rapper MC Wildflower同Sarah「合唱」，但音樂風格竟然係《Good Humour》時期嘅瑞典跳脫風格（當然加強咗節拍），可以講係自從P.M. Dawn嘅《Set Adrift Of Memory Bliss》之後，令人聽得最開懷舒坦嘅「數白欖」歌曲！最後，結尾點題作《Finisterre》由Sarah沉著地半讀半唱，輕輕洩露出專輯唯一嘅落寞感覺。Finisterre，原來亦可解做世界末日。
對好多人嚟講，《Finisterre》可能只係某隊半紅不黑樂隊某張不進則退之作，預計專輯頂多只能獲得持平嘅評價。但好多人都唔明白，無論Saint Etienne喺音樂上有何改變或倒退，點樣都好，都唔係最重要；最重要係佢哋背後嘅音樂本質，仍然係咁年輕美麗；佢哋仍然係整齊三位一體，未曾改變。我相信，我以後仍然會聽住Saint Etienne同《Hobart Paving》，世界亦突然會因為咁變得可親。擁有呢個想法嘅，應該唔止我一個人。
And baby, don't forget to catch me……
~Saint Etienne《Hobart Paving》
