農曆新年對華人嚟講意義重大，今年大年初一更咁啱係星期日，各位球迷大可將今周英超比賽當「賀歲波」睇；今周云云賽事入面，最矚目肯定係阿仙奴主場迎戰曼聯一仗 —— 兩隊傳統Big 6強隊喺經歷多年浮浮沉沉後，今季終於回復強勢、雙雙「Slight Return」返到榜首前列位置迎接呢場仙魔大戰，自然別具意義。
「Where did you go？When things went wrong for you……」回到90年代後期至千禧年代初，費格遜領軍嘅曼聯同雲加領軍嘅阿仙奴，基本上主宰成個英超，冠軍來來去去不出呢兩隊，兵工廠同紅魔鬼亦因此成為新宿敵，每次對碰都精彩萬分，更火花（及火藥味）十足。不過自從費Sir及雲加退下之後，兩隊漸見失色，行錯咗好多路，更試過無法打入前四失去歐聯資格（今季就係），呢個係當年絕對唔會發生嘅事。
「What did you learn？Locked away all on your own……」阿仙奴同曼聯錯咗咁多年，領隊轉嚟轉去，直到阿迪達同坦夏上任後，先至穩定落嚟。兵工廠願意俾時間阿迪達重建，無得踢歐聯都無所謂，嚟到今季終見成果。坦夏去年夏天來投時候，紅魔鬼根本係千瘡百孔，佢上任後馬上建立威信同軍紀，就算係球王都無面俾，成功將一盤散沙重新團結起來。兩隊這些年來最終學到嘅，就係搵到啱嘅人，以及耐心等待啱嘅時間。
「You don't have to have the solution / You've got to understand the problem……」也許一日未重奪英超冠軍，一日未代表阿仙奴同曼聯重建成功，但起碼佢哋已清楚知道球隊問題所在，並努力對症下藥。大家已好多年無睇榜首仙魔大戰了，相信今場精彩可期（我自己當然想曼聯贏，今季雙殺阿記）。送上英倫樂隊The Bluetones嘅Britpop金曲《Slight Return》俾呢兩隊，希望佢哋今季表現唔止係曇花一現Slight Return，而係一個起步點，重拾昔日英超強權強勢嘅Grand Return！
（原文2023年1月22日喺NowSports網站上載，現改成粵文版本）
