唔敢相信嘅事，最後都係發生。2023年，草莓救星正式復出，一切恍如夢幻，但絕對唔係泡影。由今年3月佢哋喺社交平台發放「起床了」嘅樂隊合照，其後參與墾丁草根音樂會、喺女巫店辦Acoustic Live……再到近日走入錄音室，錄製2014年《德古拉城市》後新作，一切一切，都係真實嘅，只係我至今仍然唔敢相信而已。
草莓救星今次選擇墾丁草根音樂會，作為佢哋首場復出演出，單睇相片，場地設計十分正斗，前排中間係游泳池，觀眾可以浸喺清涼嘅水入面，聽住草莓唱歌。可惜當晚佢哋無玩《自在》，唔係就可用現場泳池水聲，完美代替歌曲本身嘅海浪來潮聲效！
草莓救星復出演出@墾丁草根音樂節：https://www.wssband.com/草莓救星復出演出墾丁草根音樂會/
來到上月尾嘅女巫店演出，草莓終於有玩《自在》，更有ARNY哥哥ALGY（《德古拉城市》監製）同暫時離團嘅啟泰加入一齊伴奏；ARNY另一位哥哥兼草莓創隊成員Dudu，以及佢哋媽咪亦有前來捧場，感覺就好似老朋友重逢，大家更攜眷出席，全場大合唱，場面歡樂又感人……我都好想當晚置身現場同大家一起唱。可惜我唔能夠。
草莓救星復出演出第二彈@女巫店：https://www.wssband.com/草莓救星復出演出第二彈女巫店/
草莓喺社交平台發帖回顧女巫店演出時，文末留下最重要一句︰「更那⋯大家，我們就單曲見囉！」睇見一句，我不禁深深地呼吸一下！無錯，佢哋終於要發表新作啦。資料顯示，草莓已獲得台灣影音產業局本年度資助（EP類）；換言之，草莓一定要喺今年內發片，如果唔係，有關當局可能會「追數」哈哈。
所以，上周末已見草莓主音腊筆走入錄音室錄Vocal，更自爆搞錯錄音咪嘅丂一尢事（廣東話大可譯做「𤓓爆」）。咁多年嚟，腊筆都係咁搞笑可愛。咁多年嚟，我一直聽著佢哋嘅音樂，由CD到MP3到iPod到今天串流平台，我仍然一直聽緊，聽一世都唔會厭。
草莓救星正式復出錄音！腊筆自爆丂一尢事：https://www.wssband.com/莓救星正式復出錄音-腊筆自爆丂一尢事/
3年前，全球新冠疫情大爆發，我哋突然多咗好多時間。所以3年前，我製作咗一個草莓救星歌迷網站，記錄有關樂隊一切資料。網站內容未算十分齊全，之前亦無更新好一段時間。但如今草莓復出，連ARNY嘅康士坦的變化球亦告回歸推出新專輯，我都唔能夠怠慢，會慢慢加入更多內容（如果日後有時間加埋草莓分支NyLas嘅資料就更完美），還望各位草莓樂迷多多支持及指教。
康士坦的變化球本月復出，推出新專輯《眠月線》：https://www.wssband.com/康士坦的變化球本月復出-推出新專輯《眠月線》/
我相信，呢度都有知音人，同我一樣鍾意草莓救星。如果你未聽過佢哋音樂，我誠意推介你聽，可以由最有流行味道嘅《自在》、《說你的壞話》開始；我自己就最喜歡《太陽系》、《It's Not The End Of The World》、《寂寞小公路》和《這樣的我》……以上歌曲，去我嘅草莓歌迷網站「作品」同「影片」欄目，就能夠搵到相關連結試聽。
草莓唔同The Beatles、五月天，佢哋未必有好多好多人認識；但喺我心入面，佢哋係世界上最出色樂隊，至今仍然係。呢個亦係我製作草莓歌迷網站目的，喺今天呢個大數據網絡年代入面，記錄佢哋嘅存在，留下我對佢哋嘅印記，讓更多人認識並記住佢哋。希望呢個網站可以繼續經營下去。
草莓救星歌迷網站：https://www.wssband.com
