40年後，REVISIT齊成《Fried Rice》，10件你要知道嘅事情

80年代香港樂隊齊成，上周末喺Soical Media出Post，表示為紀念首張專輯《Fried Rice》面世40周年，將會為樂隊第一首完成錄音及派台播放嘅歌曲製作MV，我本人非常期待。

40年前，我係完完全全錯過咗齊成，到近年終於有機會聽返佢哋作品，真係好高水準，可惜一直以來唔係太多人評論佢哋。呢篇文章，我特別整理有關《Fried Rice》10件事，讓各位知音人更加認識呢張出色大碟：

1. 《Fried Rice》封面可見齊成成員翁家齊（Richard）化身大廚炒飯，原來專輯頭版200隻黑膠封面採用黑白＋雙色印刷，鑊中炒飯嘅叉燒粒同炒蛋係有顏色（見圖）。Richard表示因為成本問題，後來版本封面改為黑白，再配搭綠色單色「齊成」Logo字樣。

2. 碟中最廣為人作品，相信係派台作《Eye To Eye》，後來被林保怡及劉美君翻唱成《偷窺》；而齊成原版就由Richard一人獨唱。兩個版本我覺得都好好聽，據Richard講，中文版填詞人周禮茂當年同佢傾咗一大輪後先落筆；而編曲嘅江港生，亦喺《Eye To Eye》負責彈Bass，所以Richard對呢個廣東話版本係無投訴。

3. 《Eye To Eye》當年有兩個版本，原版由齊成自己製作；另一版本由唱片公司老闆鍾定一親自操刀，重錄Richard嘅Vocal及重新混音，變得更Radio-friendly。Richard自己當然喜歡原版多一點，但認同新版屬不同音樂人嘅口味選擇。

4. 《My Girlfriend Smokes (But I Don't) 》係另一首派台作，當年亞視國際台播過此歌MV，驚見林保怡有份打鼓，但其實錄音室版本並無佢份參與；不過Bowie後來的確有同齊成一齊玩Live。多年後港台節目《十二門逃》，Bowie及Richard再次聚首，聯同Richard姪仔、Dear Jane結他手Howie一齊夾Band。

5. 文首提及齊成第一首派台作，原來並非《Eye To Eye》或《My Girlfriend Smokes》，而係《Where's The Music Gone》，好有酒廊Lounge Jazz味道。Richard表示呢首係齊成唯一一首由佢同另一成員周功成（Joseph）合寫歌曲。

6. 碟內歌曲《The Night Is Young》Intro及電子合成器運用，實令人聯想起Eurythmics（我覺得都有啲似也叔Yazoo）。Richard表示此作早喺80年代初已寫好，當時比較Rock；後來為配合80年代中大熱嘅New Romantic / Synth-Pop樂風，而將歌曲變得電子化。

7. 碟內抒情作品《The Way Love Used To Be》編曲特別加入弦樂四重奏部份，Richard透露構思源自The Beatles經典《Yesterday》。

8. 爵士快歌《Don't Wear No Name》，屬碟內另一搶耳作品，大可用來做派台歌。歌詞叫大家唔好做潮流奴隸，比同一概念嘅軟硬天師《川保久齡大戰山本耀司》行先好幾年！

9. 網上一直有樂迷希望《Fried Rice》及齊成另一張、亦係最後一張專輯《Tsai Shing》能復刻再版，好可惜Richard表示因為歌曲擁有權問題，相信可見將來仍然無機會Reissue。

10. 留空。如果大家有任何關於《Fried Rice》嘅珍貴資料或消息，歡迎補充。就算齊成嘅音樂永遠唔能夠（官方地）重見天日，但Richard及Joseph既曾喺如此美好嘅80年代，製作過兩張如此出色專輯，足以喺歷史大時代留下印記，亦會有一班知音人，同我一樣，一直聆聽及懷念齊成。

（本文大部分內容來自齊成Facebook專頁及Favorites In Original Albums網頁）