2020年嘅香港，處處充滿抑壓、躁動、不安。曾有一刻諗過，世界末日好快會降臨。
身處當下末世大時代，香港獨立樂隊「南洋派對」（N.Y.P.D.）早前推出佢哋同名處男專輯，碟入面充斥住橫衝直撞嘅噪音結他彈奏，配上粗鄙中帶幽默嘅地道廣東話歌詞，每次聽嘅時候，竟有一種「就算世界塌下，又有乜好怕」嘅豁然感覺。
南洋派對，自2017年開始活躍於本地獨立音樂圈，由主音Jon、結他手Jack、低音結他手Chau、鍵琴手Allex同鼓手Leo組成。喺大角咀工廠大廈夾Band嘅佢哋，音樂風格非常暴烈，結他彈奏非常「梗」，Bass同鼓組成嘅節奏又非常「Un」，仲不時加入刺激電子音效，令人蠢蠢欲舞，非常之好跳，可以簡單歸納佢哋為Dance-Punk派別。
南音 x Dance-Punk
南洋派對嘅曲式旋律，以至Jon嘅唱腔，係經常性唔按常理出牌，一時半吟半唱，一時瘋狂咆哮。如果你不嬲只聽流行曲，開頭會好唔習慣。聽多幾次後，又會覺得：吖，怪雞得嚟又幾過癮。樂隊接受訪問時透露，原來Jon嘅演唱方式，係受到「南音」影響。
南音，上世紀初喺廣東同香港一帶流行嘅音樂類別，以口語說唱，由此啟發南洋派對嘗試用地道港式廣東話（唔係中文）創作歌詞，希望打破一般人認為難用廣東話寫歌嘅固有想法。樂隊謙稱無話有乜使命要推廣南音，但實際行動上，佢哋正正將南音嘅精神迴響重現，以新世代方法演繹。兩者驟耳聽落係兩個世界嘅音樂，其實殊途同歸。
食買玩 vs Sex & Drug
南洋派對呢種建構喺噪音結他同狂舞節奏底下嘅「現代南音」，究竟描繪出一個點樣嘅世界觀？其中一個鮮明主題，係「食買玩」，亦即香港人之前嘅（唯一）人生觀。專輯開場曲兼樂隊名作《佳佳》，一邊笑港女食嘅Tiramisu唔係好甜，但一邊又要犯賤想同佢去佐敦「佳佳」食甜品，絕對令港男會心微笑。末段Jon不停重覆唱「去佳佳」，亦可以有「去街街」雙重意思，簡單幽默過癮！
由急激嘅《佳佳》緊接到下一首《18座》，音樂上稍為緩和，歌詞繼續食食食，再帶女友「轉兩三個路口，條街有老鼠侍候」去食「十八座狗仔粉」。每次當聽到Jon唱「你有冇試過佢嘅勁辣菜脯，知你老土，加多罐加多寶」都情不自禁笑咗出嚟！
除咗食，當然仲要買。曲風狠勁嘅《美之》，再次顧名思義，係講去「美之時裝」買二手衫，歌詞啜核形容為「買死人衫」，更高呼「想除晒衫同你喺嗰度試衫」，兼爆粗鬧晒大細I.T、Giordano同Bossini，尾段再隨口噏（唔係rap）多段耐人尋味嘅男女試衫荒誕故事，令成首歌有晒畫面！
同好多外國樂隊一樣，sex and drug，都係南洋派對嘅歌詞取材。單刀直入嘅《雞蟲狗公鴨》、副歌大唱「你很想X我吧」嘅《Indie師兄》、「佢揸寶馬送大麻」嘅《Bmuu》⋯⋯算喇都係唔引用咁多歌詞，唔係《廻響》隨時要包膠袋！值得一提係碟內唯一充滿Laiback懶洋洋結他風格嘅《Indie師兄》，開首用上已故著名南音演唱家杜煥唱《憶往》前嘅自我簡介，頗有承先啟後致敬意味。
年青人 = 最好嘅垃圾！
世界很壞，南洋派對嘅歌曲，盡顯呢個世代種種光怪陸離色香味。或者有人質疑佢哋作為一隊獨立搖滾樂隊，點解無喺歌曲入面直接反映呢個社會嘅問題，卻一味掛住講飲講食講吸毒性愛，好似十分離地。但其實南洋派對已直接回應咗——佢哋音樂上嗰份狂野暴烈、躁動不安，完全呈現出當下年青人嗰份受盡抑壓想要爆發嘅心情。《雞蟲狗公鴨》精警一句「做最好嘅垃圾」，就係佢哋寫俾新世代最感同身受嘅回應。
電影《陽光燦爛的日子》入面，一班高幹子弟身處文革動盪年代，離地享受佢哋嘅青春放蕩日子。南洋派對則嘗試深入「有老鼠侍候」嘅爛撻撻地踎街頭，體驗青春嘅荒謬同可貴。無論身處邊一個年代、生活喺邊一個階層，青春，同樣唔可以長期抑壓，而必需要得到釋放，唔係會好大鑊，隨時電腦大爆炸！
（原文刊於第3期《迴響》雜誌）
