....Huh!?結他手Edmund上星期突然離世，一時之間心面有好多事情想講，但唔知點樣梳理。當日唯有轉發Wilson Tsang嘅Post，話俾大家知，我永遠唔會忘記….Huh!?《The Way We Are》嘅結他Riffs。
從呢幾天網上眾多掉念文可以知道，Edmund係一位百足咁多爪嘅音樂人，而我對佢嘅懷緬，大部份集中喺….Huh!?。….Huh!?嚟自我聽得最多音樂嘅90年代、亦係Britpop大行其道嘅年代。佢哋係當年少數能捕捉到英倫結他流行曲神髓嘅香港樂隊，令當時開始學聽外國流行音樂嘅我知道，香港一樣出產到可以媲美英美嘅優秀Band Sound。
自問算係第一代….Huh!?歌迷；我有買佢哋頭兩張專輯《What A Drag》及《When The Light Is Low》，仲有Live Album《Let The Dog Bark》；最後一張《Walk In The Park》因為主音Tim已離隊而無即時買，後來有朋友送咗一隻俾我。
我仲記得買過一頂樂隊Cap帽，深藍色嘅，簡單配上「….Huh!?」黃色字體。年輕時候嘅我，曾有一段時間學Pet Shop Boys嘅Chris Lowe成日戴帽出街，但其實來來去去只係戴….Huh!?加一頂狄柏之舞Cap帽而已。無聽歌嘅朋友曾問呢個「....Huh!?」字係乜嘢意思，我會好詳盡講解佢係一隊香港獨立樂隊名字，前面四點代表4位成員，後面嘅!?代表佢哋鍾意感嘆同問問題。
當然，今天我嗰頂Cap帽已不知所蹤，但CD一直保留著，呢幾日亦有攞返出來播放。《The Way We Are》嘅結他Riffs固然係型到爆燈嘅經典，仲有《Beautiful Night》、《My Favourite “Motorbike”》、《Mr. Black》....相信各位....Huh!?樂迷，都有各自嘅樂隊心水歌單，當中一定唔少得《究竟應該點》呢首中二病經典；呢首....Huh!?唯一一首中文歌有幾大影響力，相信古今已有好多人廣泛談論，喺度唔再多講。
「我採用呢一種語言，只係希望你哋明白我多一點點。」《究竟應該點》的確令更多香港人認識到....Huh!?，而我相信佢哋希望樂迷聽後，唔單止停留喺「呢首歌好好聽、歌詞好中」嘅層面。其實....Huh!?嘅音樂，並非採用當年大熱Britpop那種琅琅上口曲式，佢哋更鍾意採用半吟半唱方法去處理Verse，再加一段簡潔Chrous組成旋律部份；音樂部份Edumnd嘅結他彈奏固然搶耳，但田雞嘅Bass及肥仔明嘅鼓亦同樣有份量，加上Tim既可低調亦可狂野嘅Vocal，四人各司其職，十分合拍亦極具合作性。每次聽佢哋嘅專輯以至睇佢哋嘅Live，的確感受到眾成員佢哋付出及能力，唔會好似好多樂隊，只得主音同結他手搶晒鏡。
我認為呢一點非常重要。....Huh!?令我了解到，何謂真正佢哋樂隊精神，亦啟發我日後學習鑑賞及分辨點為之優秀出色嘅流行音樂。你可以講，音樂係好Personal嘅事情，只要我鍾意就得啦。我份人就比較醃尖，有啲歌曲，可以受萬人追捧及喜愛，但時間過後再聽返，卻覺得索然無味；可能係你同我變咗，但更大可能係，嗰啲歌曲受不了時間考驗。
而....Huh!?嘅音樂，今日再聽返，仍然係充滿青春生命力，佢哋固然令我諗返起自己昔日充滿美好及中二病嘅90年代，就好似睇返舊相簿，每一頁都盛載住回憶，以及好多不堪回首嘅尷尬，但最後仍會令人發出會心微笑。但撇除以上呢啲個人情感，理性地從音樂本質去鑑賞，....Huh!?嘅音樂絕對可以超越時代，簡稱為Classic，就如Edumnd喺《The Way We Are》中彈奏嘅結他Riffs。
