睇完《我們不是什麼》，上網睇返坊間大部份評論，皆對此作讚不絕口。我自己都幾鍾意呢齣戲，希望寫篇文抒發一下感想，希望更多人會買飛入場欣賞。
有部份評論指《我們不是什麼》對同性戀嘅描繪，仍然停留喺遠古年代，認為今時今日香港（及其他進步文明社會），已唔會戴有色眼鏡睇同性戀；對此導演邱禮濤受訪時回應：「最奇怪有人話依家無人咁鬧人（死基佬）吖嘛，最奇怪嗰啲人真係幸福啊，都唔好踢爆佢，等佢繼續幸福啦。」
咁究竟香港仲會唔會有人鬧人死基佬？我冇走入社區做田野考察。不過我諗，當一個人喺憤怒時候，往往會講出一啲好難聽嘅人身攻擊說話。
咁香港人憤唔憤怒？又或者換另一個問角度問：我哋點解會咁憤怒？我哋有冇渠道去釋放憤怒？如果冇，或者唔足夠，平時我哋谷埋谷埋，會發洩喺邊度？
你個死基佬、死基婆、死廢柴、死佬、死婆、死仔包、死女包、死廢青、死廢中、死廢老、死姣婆、死淫蟲、死道友、死盲婆、死跛佬、死＿ ＿……
以上，就係我睇完《我們不是什麼》最強烈嘅感受。
And So，電影係咪以同性戀做主軸？還是泛性戀、低下階層、無權無勢之士？定還是，我哋所有人都是？
除咗上流優皮士。好似電影入面車婉婉嘅角色Judy，佢話佢幾廿年冇搭過巴士。
啊都唔係，就算佢唔搭巴士，都可能會買樓。
修正：除咗有權有勢之士，以及主角龍Sir（譚耀文飾演）口中嗰啲「講就Liberal，做就Lolanto」嘅堅尼地人士，又稱偽君子。
最後，因為呢度主要講音樂，我都想講少少片尾曲。電影採用雷頌德作曲編曲、林夕填詞、盧巧音主唱嘅《天佑我們》完場，的確係絕配，我實在不能同意更多。唔知仲有冇其他歌曲都適合呢？
選擇一：達明一派《皇后大盜》
「繼續去路，已斷退路。浪蕩裡我跟你，我跟你，我跟你一個。」
感覺會更Personal，將情緒完全投放喺兩位主角暉仔及Ike（Anson Kong及Ansonbean飾演）嘅悲慘命運身上。但可能會過份浪漫美化，變得離地。
選擇二：群星《明天會更好》
「讓我們的笑容，充滿著青春的驕傲。讓我們期待明天會更好。」
充滿反諷效果，可以令觀眾反思我哋呢個所謂公平進步嘅文明世界，但亦有可能會出戲，帶嚟反效果。
選擇三：X JAPAN《Forever Love》
「Forever Love, Forever Dream／溢れる涙の中／輝く季節が 永遠に変わるまで」
音樂及歌詞都夾，亦可以連結電影中出現嘅HIDE（已故X JAPAN結他手）。不過香港觀眾未必第一時間Get到歌詞意思，而且版權費會好貴。
結論：都係《天祐我們》最完美🙏
