台語流行曲，曾經係娘到爆嘅代名詞。直到當年林強《向前走》一出，令人一新耳目，及後到《娛樂世界》，更係一石激起千層浪，正式告別昔日娘味土氣，開始健康多元發展，漸漸變到好似萬花筒咁繽紛豐富。
如果，今日有人以新世代手法，玩奏一首舊式台語流行曲，出嚟效果會係點？
我諗，應該會好似椅子樂團嘅新歌《Maybe Maybe》吧。
椅子樂團兩年前推出嘅專輯《Lovely Sunday》，帶有濃濃懷舊味道嘅City-Pop，風評甚佳。《Maybe Maybe》進一步將呢份懷舊氣息推向極致，好比置身活色生香酒廊度，椅子樂團就係駐場樂隊，佢哋唱緊一首浪漫到暈嘅台語情歌，嗰啲粒粒清電結他彈奏，的確居功不少。尤其末段solo，簡單直接入耳入腦，不禁令人翩翩起舞，可惜只得短短一分鐘唔夠，實在唔夠喉。
要澄清一點，我所講嘅新世代手法，唔係指乜嘢驚世駭俗嘅破格編曲或錄音；椅子樂團只係用好正路嘅手法玩奏《Maybe Maybe》。但好奇怪，你唔覺得佢老土，相反好有時代感。或者講得準確一啲，係超越左老土同時尚，單純地得出呢首歌好正好好聽嘅結論，感覺有啲似當年第一次聽張震嶽《愛的初體驗》嗰份驚喜。
椅子樂團唔止唱台語，仲有唱國語同英文。同期佢哋推出嘅另一新作《Paradise...How Far?》，亦都係一首玩得好靚嘅歌。不過我都係鍾意《Maybe Maybe》多一啲，純粹個人觀感，無客觀標準，我話係就係哈哈哈。
（原文2020年6月26日喺「紳吟」Facebook上載）
