2025年5月28日，草莓救星低調發表新歌《頭城——悼F》。樂隊獲目宿媒體邀請，參與佢哋嘅「聽見零雨」企劃，將台灣著詩人零雨嘅詩作譜成歌曲。而《頭城——悼F》，就係企劃第一首作品。
《頭城——悼F》一曲，放諸於草莓救星嘅音樂歷史上，非常獨一無二——佢係第一首非由腊筆填詞嘅歌曲，亦係低音結他手海棻首度參與作曲嘅草莓作品（同腊筆合寫）。
當日串流音樂平台首度彈出《頭城——悼F》俾我聽時候，我仍然未知道歌曲任何創作背景資料，單純從一個資深草莓樂迷嘅聽覺出發，最初見到歌名，覺得並非腊筆一貫風格；初讀歌詞，發現包含好多情景描繪，但當年腊筆喺《德古拉城市》亦有過類似寫作風格，當然後來我先知道歌詞嚟自零雨嘅詩，借一趟火車旅程，表達佢對逝世故人嘅懷念。
明白呢個創作背景之後，發現《頭城——悼F》喺旋律上的確同草莓過往作品唔同；因為無副歌，成首歌都係循著原詩嘅步伐走，一路走著，直到最後都無高潮爆發位，一切都係淡淡然，卻帶有深厚感情寄託，最後一句「謝謝，旅途愉快」，可以話係每個人獻給故人最圓滿嘅感恩。
喜歡《頭城——悼F》，當然唔止因為我係草莓迷；歌曲中浮游不定嘅夢幻氣息，屬近年中外獨立樂圏非常普及嘅音樂風格之一，但其實草莓早年轉型後，已非常擅長呢種風格，今次新歌，自不然屬前輩級示範。
喺繼續靜靜期待下一首草莓新作之時，留意到「聽見零雨」企劃除咗草莓，仲有多個音樂單位參與，另一首新歌、緩緩嘅《缺口——寄W》已同告推出；如果目宿媒體最後會為今次企劃推出實體唱片，我一定第一時間訂購！
