唔知呢度有無人鍾意あいみょん（愛繆 / Aimyon）？
早前到訪沙田禾輋邨一間日本燒物小店「町燒酒食」，正當我細意品嘗店內超邪惡但超正嘅焗芝士蛋茄子時候，店內播放嘅音樂，令我不得不分神過去。
餐廳電視螢幕上，正播放一位日本女歌手現場演出，樣貌有啲似影后鍾雪瑩，左邊臉頰仲有一顆銷魂癦。佢衣著打扮撲素，睇落令人感覺好舒服。
小妮子全程專心一致，一邊掃撥結他一邊高歌。相信佢係一位唱作女歌手。佢唱緊嘅那首歌曲，旋律並非超級Catchy易上口那種，沒有太大起伏，卻係我喜愛嘅Style，平淡中帶有一份Hook住聽者嘅魔力；伴奏樂手彈奏嘅電結他和弦及Solo亦唔算複雜，但同旋律非常夾，負責編曲嘅相信係高手。
待歌曲差不多完結、快要播放下一首歌之際，我連忙放下食物，上前問店員：「呢首歌係邊個唱㗎？」「我都唔知……等我睇睇電視Youtube播緊乜。」就是這樣，我認識了愛繆這位日本唱作女歌手，佢呢首歌叫《君はロックを聴かない》（你不聽搖滾），2017年發表，收錄喺專輯《青春のエキサイトメント》（青春的悸動）內，而我當日喺餐廳睇到嘅，係2019年巡迴演出版本。
點解我會鍾意《君はロックを聴かない》？在反覆聽過好多次後，我得出一個結論：這歌令我回想起《還是會寂寞》Pop Rock時期嘅陳綺貞，但愛繆嘅Vocal並非陳綺貞般甜美少女腔，佢把聲其實好溫柔，卻帶點漫不經心，我同樣無比受落。
《君はロックを聴かない》歌詞亦寫得相當唔錯。喜愛搖滾音樂嘅歌者，希望同身邊唔聽搖滾嘅人，分享佢熱愛嘅夢想，就算對方未必喜歡或完全明白，都無所謂。與其刻意改變自己討好別人，不如將自我真實一面呈現於人前。我明白待人處世，好多時候必需「假假地」，先可以保護自己。所以在音樂範疇，願意對自己坦誠嘅歌手樂隊，從來最得我歡心 。
有眼不識泰山，原來愛繆喺日本十分紅，台灣亦有唔少Fans，香港就唔算太多人聽。由遇上《君はロックを聴かない》開始，我會嘗試聆聽返愛繆過往作品，不過數量確實唔少。如果有知音人係愛繆嘅Fans，請留言多多推薦佢其他好歌，先多謝你哋。
最後，文首提到嘅「町燒酒食」，那是一間相當值得推薦嘅小店，Google Map有高達4.6星評分，如果行開嚟沙田，不妨試試。
（後記：謝謝一眾知音人，過去呢個星期喺Facebook為我推介多首愛繆歌曲。認識舊嘅音樂人 / 樂隊有一個好處，好似今次，我可以將あいみょん過去10年嘅歌曲，濃縮喺幾個星期內一次過聽盡，感覺十分滿足。
我根據知音人嘅推介，加上自己嘅心水，挑選咗一個【あいみょん 愛繆 AIMYON 知音人】Playlist，用上我最愛嘅《君はロックを聴かない》做開始同完結，如果大家有用Spotify不妨聽聽；如果當中仍遺漏邊啲出色作品請告知，希望大家鍾意呢個Playlist！）
