認識薄荷葉樂團已20多年，由當年喺誠品Tower Records睇佢哋同一眾小白兔橘子唱片樂隊玩Live，好似已經係年代好久遠嘅事喇。
之前一直有追蹤薄荷葉嘅Facebook，佢哋數年前復出，除咗有玩Live，亦有喺錄音室灌錄新歌，但一直只聞樓梯響。直至2025年今夏，終於等到佢哋睽違已久新作《深灰》，全長超過10分鐘，應該係薄荷葉史上最長細碟？
可以預期，《深灰》為樂迷帶來薄荷葉與別不同另一面。雖然我一直知道佢哋Rock得起，但由Intro電結他一響起，已充份感受到《深灰》一曲嘅技術搖滾架勢，全曲多個段落起伏，編曲及演奏非常緊湊精彩，全曲10分36秒，的確係毫無冷場。
《深灰》亦令我回想起，以往薄荷葉專輯大抵都有一首長篇作品，好似當年嘅《Jubow Dark》及《紀錄片》；今次《深灰》同樣令我聽得大呼過癮，而且音樂表達及技術上更成熟更出色。佢哋亦憑此作清楚話俾大家知：已20多年歷史嘅薄荷葉，今天正式滿血回歸！
《深灰》發表後，薄荷葉同時公布樂隊第四張專輯《¬ NOTtoBE》將於本月底面世，專輯只有5首歌曲，比Felt當年嘅6曲專輯仲要少歌，卻全長達40分鐘（平均每首歌長8分鐘）！可以預期，碟內新歌應該都係走Epic曲風，and this is one of my favourite music style，熱切期待！
