《非常突然》（1998年）係我人生最愛電影Top 3，咁多年嚟都唔知翻睇過幾多次。今早非常突然傳來許紹雄逝世消息，我腦裡馬上諗返起佢喺電影入面嘅演出。
《非常突然》未必係許紹雄廣為人知演出代表作，我自己印象卻非常深刻；佢飾演「槍神」，一位槍法如神嘅包二奶警探，佢同劉青雲兩幕「要大定要細」嘅精彩幽默對話，每次睇返都令我笑爆嘴。
但當然，每次睇返《非常突然》，個心都會乸住乸住，尤其結局。「有遮嗰陣時就無雨，無雨嗰陣時就有遮。」槍神片中呢句金句，概括了整套電影主題，亦概括了人生中處處充滿無從預期嘅無常。
《非常突然》有唔少錯摸輕鬆嘅趣味，但最後佢仍然係一齣無比沉重嘅電影。佢最勁嘅地方，係劇本對白並冇任何寓意暗喻，但睇完之後，你會覺得成套電影係充滿寓意暗喻，然後你會嘗試去明白一啲老套不過大道理：活在當下、珍惜眼前人、開心嘅時候就盡情去開心。
