黃耀明最近推出久違新歌《此生，你我皆短暫燦爛》，坊間大部份評論，以至創作者本人，皆主力談論歌詞意義，其他方面好似無乜人品評，呢部份就由我負責補上吧。
《此生，你我皆短暫燦爛》由明哥及老拍檔Jason蔡德才作曲，Jason同兼任編曲一職。老老實實，以歌論歌，《此生》旋律以流行曲角度而言係比較平淡，副歌部份好一點，可惜聽咗好幾次後，仍然沒有記憶點。
反而編曲就救返首歌唔少，Jason刻意加入大量懷舊電子音色，讓聽者聯想到唔少80年代Synth-Pop或新浪漫歌曲，包括達明一派嘅《神奇女俠》。Synth-Pop／新浪漫，真係聽一世都聽唔厭嘅音樂類別。
《此生，你我皆短暫燦爛》嘅音樂底確實唔錯，要形容為明哥回勇之作也無不可。歌詞部份不說不說還需說，其實同達明一派前作《今天世上所有地方》分別不大；但《今天》於2020年發表，有佢嘅時代意義；五年過後，《此生》仍然繼續叫我哋「前途無限暗／必須要燦爛／為存在吶喊」，那就未免太唚氣，及不合事宜了。
五年過後今天，我哋仲需唔需要《此生，你我皆短暫燦爛》嚟激勵自己？都已經五年喇，要覺醒嘅早已覺醒，要重新出發嘅早已重新出發，更大部份嘅人，其實都係為自己。
為自己完全無問題，世界咁大，個人咁渺小，只要大家認為過到自己嗰關就得，畢竟我哋大部份人都係平庸之輩。《此生，你我皆短暫燦爛》歌名取自越南裔作家Ocean Vuong（王鷗行）同名小說，原名為《On Earth We're Briefly Gorgeous》，令我想起多年前英國Indie-Pop樂隊Fosca（已解散）一首《On Earth To Make The Numbers Up》。
《On Earth To Make The Numbers Up》同為充滿Synth-Pop味嘅流行曲，歌名我超譯為《此生，你我皆為湊夠數》。歌詞非常冗長，用上大量英倫俚語，透過多幕人生零碎片段畫面描寫，既談及平凡人嘅無力感，更入肉係帶出人生存喺世上，只係一個無關重要嘅存在，只係為湊夠數，可有可無。
咁講好似好殘酷，但現實就是如此。明白到呢一點，我哋先可以再出發。不過唔明都唔緊要，啲人成日講，無知嘅人係最幸福。《此生，你我皆短暫燦爛》填詞人周耀輝，一直係我最喜歡同最敬仰嘅填詞人。佢曾經為盧巧音寫過一首《無題》，我認為更適合用來激勵平凡不過嘅大部份我們：「隨便幸福過一切／似是無謂／更像無題／懶下題目更勝上帝」。
又咁啱，《無題》都係一首Synth-Pop作品，多謝負責編曲及監製嘅前浮世繪成員梁翹柏（以及作曲嘅盧巧音），首歌真係好好聽，非常Timeless，套用在任何年代嘅平凡人身上，同樣有共鳴，正！
