唔知呢度有無人記得Stranded Whale？佢哋5年前解散，而為紀念處男專輯《Northern Tower》今年推出10周年，樂隊同「Zenegeist 識你佳」合作，低調辦一場復出Live Gig，後日11月12日星期三就係，地點係新蒲崗Portal。
曾經有一段時間，我係放棄無聽香港獨立音樂，當時少數例外為Stranded Whale。一直認為，Stranded Whale嘅獨立民謠風格，放喺當年嘅本地Indie Scene，總覺有點格格不入（唔關佢哋事），就好似一條擱淺嘅鯨魚；如果佢哋係外國Indie Band，或者會有更好發展？所以我好鍾意佢哋同台灣室樂樂隊Cicada合作嘅《Grey》（收錄喺樂隊第二張專輯《The Revival》內）。
至於《Northern Tower》，10年後今日聽返，仍然好好聽，好有長青調子，《Killer Whale》、《Call From The Higher Ground》、《Interstellar》、《Release The Swallow》係我嘅心水歌曲。
Stranded Whale當年解散後，兩位主音Jabin同Tomii都有推出Solo作品，Tomii更有同近年我最愛嘅香港獨立樂隊之一「假日貞操」合作（吹色士風）。鯨魚擱淺已5年，後晚會回歸海洋演出一場。白天大家要上班去，晚上你會到達新蒲崗現場嗎？
P.S. 咁啱Cicada最近發表新專輯《凝視白色的邊界》，本人正開心細聽中。唔知Stranded Whale之後又會唔會有後續新搞作呢？
