80年代，係我開始聽歌嘅年代。我嘅唱片店回憶，亦由嗰陣時開始。土瓜灣德信商場嘅「四海唱片」，係我人生購買第一張專輯嘅地方。
德信商場，未住過土瓜灣嘅香港人，未必知道佢嘅存在。佢只不過係普通不過嘅街坊小商場，賣啲民生日用品例如衣服，亦有賣消費品例如電子遊戲、唱片等等。
前嚟德信商場嘅人，大都份都係土瓜灣居民。亦因為咁，德信商場盛載咗土友滿滿回憶。我哋嘅成長歲月，總會喺德信商場留下印記。
而「四海唱片」，就係我同德信商場嘅重要印記。
唔知道大家小時候幫襯嘅街坊唱片店／街坊商場，到今日仲喺唔喺度呢？可以留言分享一下。
「四海唱片」屬地舖，就喺商場入口旁。除咗賣唱片，仲有曬相服務。呢部份我無記憶點，唔知有無土友喺呢度曬過相？曬得靚唔靚？
「四海唱片」店舖唔算大，店內兩旁放著一格格唱片陳列櫃，正常齊胸高，方便客人隨手搵黑膠。兩邊黑膠櫃上，就係密麻麻一行行嘅盒帶牆，放滿唔同廣東流行歌手或樂隊嘅專輯／EP。
而家諗返，「四海唱片」嘅Cassette Wall，好比一幅大型拼貼藝術展示，記錄低Cantopop嘅興盛年代。可惜當時我無相機，未有幫佢拍照留念。
我人生最重要嘅專輯——達明一派嘅《石頭記》，就係喺「四海唱片」入手，無記錯價錢應該係27元，足足用咗一、兩個月時間先儲夠零用錢買。其實同期我都幾鍾意Raidas首《傳說》，但零用錢只夠買一餅盒帶，最終喺兩者之間揀咗《石頭記》。
原因？我都唔係太記得喇，可能因為《石頭記》封面更靚吧。後來證明呢個決定絕對正確，達明一派日後成為我最大音樂啟蒙，令我有興趣接觸外國流行音樂。如果達明從來無存在過，今日嘅我，應該未必會喺呢度，寫呢篇回憶錄。
不過我人生第一張購買嘅專輯，並唔係《石頭記》，而係張學友1986年推出嘅《Amour／遙遠的她》，因為當年我好鍾意學友一首《月半彎》。為咗寫呢篇回憶錄，我特登由頭到尾聽返《Amour／遙遠的她》，感覺係……Well，《月半彎》仍然非常浪漫動聽，如果結尾嘅音樂演奏可以再長多一分鐘，會更完美。
我仲搵到呢隻碟同達明嘅連結——為《Amour》填詞的嘅黃靄君，就係達明早期第三名成員兼御用填詞人陳少琪嘅太太！
後來聽歌聽得多，「四海唱片」已唔能夠滿足我，始終佢主要售賣廣東主流唱片。不過我相信，嗰個年代好多香港人同我一樣，都係由從樓下街坊唱片店開始，買下人生第一張黑膠，或第一餅錄音帶，展開我哋嘅音樂人生旅程。
今日，德信商場仍然健在，「四海唱片」原址而家係一間地產舖，以及一間曬相店，都算承繼咗「四海唱片」嘅一半血統吧哈哈。
我嘅「四海唱片」Shopping List：
張學友《Amour／遙遠的她》
蔡楓華《絕對空虛》
達明一派《石頭記》
達明一派《達明一派》EP
達明一派《Remix》EP
達明一派《我等著你回來》
達明一派《夜未央》EP
