最近心情有點低落，需要聽一啲正能量歌曲Cheer Up一下，Charming Way與Kayan9896合作呢首《呯嘭哇！》，相信最適合不過。
本人向來對正能量歌曲要求甚高，太過積極正向，好容易變成虛情假意、一味販賣廉價正能量。《呯嘭哇！》平衡點卻做得好好，基本上佢係一首結他流行曲，令人想起90年代Britpop；但Britpop放諸今天仍然唔過時，你睇Oasis重組開騷仍然賣過滿堂紅、陳慧琳Dry再次合體扮彈結他唱港版《Beautiful Ones》，成為唔少人嘅回憶殺，就知Britpop本身係一種長青Music Genre。
當然Britpop作品都有高低之分，而《呯嘭哇！》可列入高質示範，令我聽得賞心悅目，旋律易上口卻非一般Cantopop悶旦曲式；我要特別點讚結他手Kalun尾段嘅Guitar Solo，非常有型及動聽，咁先至夠Charming嘛。
《呯嘭哇！》主旨係「生活縱不如意及有雜音，但我們仍可選擇堅持自我」，正向之餘，亦有值得細味之處。副歌一段「Take me high / Under the dark grey sky」已可堪玩味，大方向係積極，用詞卻帶點黑色幽默。中文歌詞部份更刻意用上「塞翁失馬、焉知非福」、「千夫所指」、「百態有百般美」（千姿百態）、「信者得教」等較古雅嘅成語及用詞，中英夾雜背後，碰撞出有趣玩味，我估計係有份填詞嘅張天穎主意。而最後一句「已過了最壞」，足證《呯嘭哇！》屬正能量歌曲無誤，我個人認為咁寫未免太樂觀了，but nevermind anyway。
《呯嘭哇！》當然比《紀念日》高質，Kayan9896嘅聲線亦足夠甜美，用來唱Britpop係幾好聽——記憶中當年好幾隊女主音擔綱嘅Britpop樂隊如Elastica、Echobelly、Sleeper等，都非走甜美聲線；Kayan9896日後不妨試試多唱呢類型作品，大可繼續請Charming Way操刀，如果走The Sundays那種風格應該唔錯，當年王菲都翻唱過佢哋呢（《Here's Where the Story Ends》Vs《為非作歹》）。
至於Charming Way……昔日我喜歡嘅你哋，今次終於返來了！另外恭喜你哋有份主演同創作主題曲嘅《柴灣電影會》，獲得美國短片節「Independent Shorts Awards」7月最佳短片獎。樂隊作多元化發展係好事，但記得繼續Keep on Rocking！
