1. 只要有盧慧敏（Amy Lo）演出，就足以吸引我入場G持（從《仇老爺爺》已開始留意佢嘅筆者表示）。
2. 大部份港產片就好似香港一樣，近幾年被人彈到一文不值。不過喺我眼中，從來只有好同唔好嘅作品，非關是否香港出品事。而《觸電》，我會評定為非常好嘅商業爆谷電影。電影大橋其實老套不過，講一隊有老有嫩有中坑嘅電競雜牌軍，如何一步一步越級挑戰強權對手；以往不少影視作品如《少林足球》、《點五步》、《教束》、以至文學一點嘅小說作品《強風吹拂》，都係採用同一套路。但正所謂「橋唔怕舊、最緊要受」，導演梁國輝拍得純熟流暢，全片93分鐘有笑有淚有動作，劇情毫不拖泥帶水，可見梁導經過多年副導及前作《陰目偵信》累積嘅經驗下，嚟到《觸電》終於修成正果。
3. 《觸電》屬群戲，但相信唔少人焦點都放喺林敏驄度。大家亦都好似成日擔心佢會太過Off-Beat搶去風頭兼帶離故事主題。其實驄哥一直嚟都係遊戲時遊戲、認真時認真嘅最佳典範，記得80年代嘅佢，已憑處男專輯《自妳去後》令樂迷聽到佢認真而多元化嘅音樂才華。而《觸電》入面嘅驄哥，更成功將角色感性同搞笑兩面合而為一，正當你為電影情節觸動投入之際，佢突然一句幽默爛Gag對白，又會令觀眾發出會心微笑。
4. 除咗驄哥，《觸電》一眾角色Casting亦恰如其份，真正主角柯煒林飾演（過氣）電競高手，固然有點木獨，卻係角色性格使然；佢嘅木獨，配搭起女主角、試當真Yanny陳穎欣嘅主動E人，以及驄哥嘅幽默，的確擦出火花。電影仲請嚟唔少老戲骨演出，羅莽師傅打電競兼Crossover佢當年嘅《金臂童》，既係神來之筆，亦符合劇本情節推進，絕非純為懷舊Gimmick而硬塞入去。
5. 承第1點及第4點，《觸電》嘅流暢同Casting嘅恰當，背後要靠一個出色劇本支持。電影以新世代電競做包裝，骨子裡其實係一套非常港式動作喜劇，主旨為「團隊的重要性」及「勇敢面對走下坡」，當中對白都有唔少金句如「上斜落斜，都係斜路」、「跌低咗咪當瞓喺度」……勝在唔會太刻意為之，卻透過一眾主角嘅經歷同成長，感受到電影嘅正能量。
6. 承上點，仍然留喺香港嘅香港人，入場睇《觸電》，真的有另一番觸電。團隊的重要性，我哋好似從來都無，一直以來只有冷嘴熱諷；但勇敢面對走下坡，呢個真係我哋大家必需好好思考嘅命題，唔係條路真係好難行落去。
7. 《觸電》結局，雜牌軍究竟能否戰勝強勁對手？梁導嘅處理手法，實令我想起另一套自己好鍾意嘅荷里活音樂電影，兩者實有異曲同工之妙，同樣令人睇到眼濕濕。為免爆雷，在此不贅，但我知道梁導一定有睇過我講嗰齣電影。
8. 感謝「電影朝聖 Film Pilgrimage」嘅《觸電》專訪，令我得知電影中多幕電競遊戲場景，原來嚟自香港四個具有本土特色嘅Location——葵涌醉酒灣瑞興皮廠、羅湖上水大水管、空置多年嘅荃灣荃景圍街市，以及赤柱污水處理廠。睇完之後，你唔會覺得「香港真係好撚靚」，但會同意「香港係一個好撚特別嘅地方」。
【專訪】《觸電》導演梁國輝；編劇賀鑫／文：王冠豪GARY（電影朝聖）
9. 電影成本不算高，但入面嘅電腦特技喺限米煮限飯嘅情況下，已算做得相當唔錯（肯肯定好過《斷網》）。原來擔任視覺特效總監一職，就係「鳩寨Cult」YouTube Channel寨主梁仲文，唔怪之得啦。推薦寨主前作《神骸軀形》，最重要係由我另一女神Alma做女主角。
10. 電影初段林敏驄「挑機」柯煒林一幕，二人玩嘅超任舊遊戲《Top Racer》，係本人難忘童年回憶之一，遊戲速度感非常正。此作早排出返Reissue版，老司機們要玩返！
