（原文刊登喺2001年《mcb》投稿版，現版本稍作修改）
2001年夏天，身處異鄉台北，某日朝早，嚟到現已關門大吉嘅「誠品音樂」台大店，當我專注搵Post-Rock樂隊如Ui同Flowchart舊作時候，店入面播嘅音樂，令我無得唔分神過去。
「好似Mogwai，仲有Contriva！」呢個係我耳邊第一個感覺。簡明結他旋律、重覆和弦結構，好typical嘅Post-Rock格局，一聽就知係我杯茶。即刻走去收銀櫃檯問店員，呢隊係邊隊樂隊嚟，佢吐出「甜梅號」三隻字，令人意外係佢緊接一句：「我係呢隊樂隊嘅結他手！」
甜梅號（Sugar Plum Ferry），台北獨立樂隊，三位成員包括負責結他同主唱（其實佢哋主要玩純音樂，唱嘅部份唔多）嘅小白、彈低音結他嘅葉子，以及鼓手柚子。誠品音樂播放嘅，係佢哋當日新推出嘅處男專輯《是不是少了什麼》（Lack of Something）。小白問我：「今晚我哋有一場Live Show，有興趣嚟嘛？」我記低時間地點：「好啊，我應該嚟到。」
一個人的捷運
離開「誠品音樂」，一個人坐捷運由公館去淡水。嗰日係星期六，去淡水嘅遊人好多，捷運車廂入面，人群擠到水洩不通。我將《是不是少了什麼》放入Discman，將音量開到最大，合上眼睛，夾雜喺嘈雜人群中間，佢哋講啲乜，我已開始聽唔到，耳邊響起嘅，只有甜梅號嘅音樂。
甜梅號嘅音樂，真係好似Mogwai，嗰種由寧靜漸變狂亂，再回歸沉寂嘅音樂模式，根本就係Mogwai喺《Come On Die Young》時期嘅顛峰表現。
仲有Contriva，甜梅號喺處理樂曲開首嘅簡潔和弦時，嗰啲乾澀嘅流麗結他彈奏，處處令我想起Contriva嘅清新Post-Rock風格，動聽得無話可說。仲有Godspeed You! Black Emperor同Fly Pan Am嘅山雨欲來氣勢、The Sea and Cake嘅冷靜沉鬱，或多或少都可以喺佢哋某啲樂曲片段入面，搵到相類近氣味。
身邊人群繼續高談闊論，我繼續合埋眼睛，置身喺一個人的水道，任由五官精神，隨住甜梅號肆意漫遊。而家聽緊邊一首曲目？都唔再重要，我只知《是不是少了什麼》帶俾我58分46秒嘅抽離疏冷空間，比由公館坐捷運到淡水嘅車程仲要長。
短短一程車程，我愛上甜梅號。小白、葉子同柚子紮實緊湊嘅演奏，再次引證Post-Rock嘅魅力：毋需冗長歌詞、複雜旋律，只要幾個簡單和弦，就能演奏出豐滿多變嘅純音樂，入面已包含咗千言萬語，任由聽嘅人自行心神領會、自我沉溺其中。雖然《是不是少了什麼》嘅錄音及混音水準未盡人意，一切都阻止唔到甜梅號展現佢哋嘅音樂才華。
宿命中拒絕宿命
夜晚，嚟到台北師大路一間叫「地下世界」嘅陰暗酒吧，細小空間入面早已滿座，其實都係得百幾人啫。舞台燈光音響好簡陋，呢一切都係地下樂隊搞音樂會嘅宿命格局，不過我深信甜梅號非池中魚。柚子成晚好cool好專心打鼓擊；葉子成晚背對觀眾，匿喺Amplifier前彈低音玩effect；小白成晚垂低頭彈結他，好有Shoegazer風範。現場嘅甜梅號好低調好怕羞，音樂卻比大碟更迷幻更狂亂，某啲樂曲更有Post-Punk色彩，嗰份空間感更為之擴張，唔小心嘅話，隨時跌入佢哋挖下嘅深淵。
多謝，你哋提醒咗我
「你哋玩得相當唔錯！」呢句係完場後我同小白講嘅一句老土讚美話。世上有無數鮮為人知嘅出色樂隊，甜梅號唔會係第一隊，亦唔會係最後一隊。但既然俾我碰巧遇上，一切好似命裡有數，絕唔容許我有任何異議，一切都係天注定。
不過呢，生命仍要繼續行落去，咁甜梅號對我日後有乜影響？當年嘅我當然唔知道，只知道嗰時成日匿喺房入面，沉溺喺一個又一個58分46秒嘅《是不是少了什麼》世界入面，然後問自己，咁樣樣有咩作為？
多謝甜梅號，當年就係你哋，提醒我「是不是少了什麼」。
