今季英超曲終人散，對我輩曼聯球迷而言，球隊最終有驚無險打入前4重返歐聯，同時有望做聯賽盃足總盃雙冠王，相信曼迷已滿意收貨。但筆者第二最愛英超球隊修咸頓，今季卻踢到不知所謂，最後做包尾大幡跌落英冠，心裡確有點不是味兒，或者The Verve嘅Britpop名作《Bitter Sweet Symphony》，會係我對今季英超最佳心情寫照。
回想季初，紅魔鬼喺新領隊坦夏帶領下開首兩仗連敗，看風駛𢃇嘅傳媒及球迷自然急不及待得出「咪一X樣」結論。但踢完一整季，曼聯表現無疑係費Sir年代後最佳。從戰術踢法層面，曼聯確能漸漸做到後場組織、前場迫搶，尤其喺季中表現最佳時候，更展現出可擊敗任何球隊嘅能力及決心，呢方面確實比之前蘇斯克嘅無為戰術，進步一大截。
從領導層面，坦夏亦比蘇斯克查，甚至更早之前嘅名帥雲高爾、摩連奴更出色，單係睇佢點樣解決球王基斯坦奴朗拿度嘅問題，已知道坦夏就同費Sir一樣強硬，絕對唔接受球員可以凌駕球隊，亦令曼聯重拾久違嘅軍紀及士氣，最終今季亦打破多年錦標荒贏得聯賽盃，足總盃也殺入決賽，如果能擊敗「嘈吵鄰居」曼城捧盃，今季就真係紅魔鬼甜美一季。
相比之下，修咸頓嘅故事令人苦澀傷心。球隊季初表現已不如人意，領隊哈辛赫圖好快被炒，換嚟英冠盧頓領隊尼敦鍾斯接手，事後證明係聖徒降班主要原因，呢方面筆者之前已曾撰文提及。簡單而言，就係請嚟一個只得英冠料子嘅領隊執教，加上近年球隊青訓水平及買人眼光越見下滑，球隊豈能不降班？
更諷刺係，盧頓自鍾斯離去後表現更上一層樓，最後更喺升班附加賽勝出，成功升上英超。一來一回，令鍾斯可能成為英超史上首個喺一季內曾執教降班及升班球隊嘅領隊，如此「出眾」數據，教聖徒球迷情何以堪？
球迷，可能係世界上最忠心嘅感情動物。只要你選擇一隊球隊支持，就永遠唔會轉會。球迷，亦係世界上最無奈一群，如果心愛球隊踢得好、連奪冠軍，固然可喜；但當愛隊庸碌無能，甚至降班，球迷除咗柴台、傷心，仲可以做乜？「And I'm a million different people from one day to the next / I can't change my mold」，《Bitter Sweet Symphony》一曲講述平凡人面對世界，往往束手無策，球迷亦如是。今季是喜還是悲，都已過去，唯有展望新一季，記得Mark低8月12日英超開鑼！
(原文2023年5月31日於Now Sports網站上載，現稍作修訂，並改成粵文版本)
