趁英超正休季中，筆者將一連3期介紹3支升班隊伍，其所屬城市又有邊啲著名音樂人或樂隊？佢哋又跟足球有何關連？
第一隊登場，當然係英冠之王般尼。降班不過1年，球隊便火速重返英超，證明新領隊、前曼城名將甘賓尼嘅能力。最近有報道指佢哋早喺6月初已復操，為新球季做足準備；更有傳買入上季喺些路迪表現出色的日本前鋒古橋亨梧，似乎躊躇滿志，有一番大計。
觀乎甘賓尼為般尼帶來嘅改變，由戴治年代嘅傳統英式踢法，漸漸改為融合走位互傳，成績立竿見影，但升上英超後能否重新站穩陣腳，重拾昔日「般尼從來不易」嘅強硬氣勢？呢點要待開季後先知道。
談到般尼同音樂嘅關連，當然不止王傑嘅《幾分傷心幾分痴》（「般尼從來不易」一句改詞源自此作）；當地最著名嘅音樂名字，肯定係左翼搖滾樂隊Chumbawamba，佢哋早於1982年喺般尼組成。1990年代末，樂隊有一首風靡全球嘅經典《Tubthumping》，可能唔少球迷或Game迷都聽過 —— 此曲當年徵用喺EA Sports出品嘅1998法國世界盃足球遊戲《World Cup 98》，每次開機玩時候，都會播呢首歌開場，非常洗腦。
Chumbawamba同期另一名作《Top Of The World (Ole, Ole, Ole)》，更開宗名義談足球，講及不同階級人士只要來到球場，任何人都有機會成為贏家，非常切合樂隊嘅左傾思想，亦很適合用於宣揚足球場上公平競技。所以此作同時收錄喺1998年法國世界盃官方音樂合輯《Music of the World Cup: Allez! Ola! Ole!》內。Chumbawamba呢兩首足球歌曲，可以話比當年官方主題曲、Ricky Martin的《The Cup Of Life》更深入民心，起碼到今天仍有唔少樂迷、球迷及Game迷記得點唱！
（原文2023年6月28日於Now Sports網站上載，現改成粵文版本）
