英超轉入最後直路，無論前列爭冠及榜末護級仍然鬥得如火如荼；球場以外，一名聲稱嚟自英超嘅神秘饒舌歌手Dide「橫空降世」，佢嘅處男作《Thrill》喺Youtube發表短短半個多月，已獲得超過150萬View數。MV中Dide戴上黑玫瑰花紋頭套，全程無露面，成功帶起輿論話題，各大傳媒及廣大球迷紛紛猜度佢係邊個？
綜合各界「分析」，大部份均認為Dide真身好有可能係阿仙奴前鋒基迪亞（Eddie Nketiah）。首先佢個名Eddie跟Dide非常近似，《Thrill》歌詞中一句「my team stay winning」不禁令人估佢係嚟自今季當銳嘅阿仙奴。加上Dide嘅說唱口音十分倫敦，歌曲MV亦喺倫敦Bermondsey區取景……凡此種種，皆同基迪亞嘅出身背景吻合。有傳媒更認為Dide嘅聲線好似基迪亞，賭博網站亦將呢位兵工廠前鋒視為Dide真身大熱人選。
不過，MV中有一幕拍到Dide右手有紋身，基迪亞本人並沒有；眼厲網友發現呢個紋身同前利物浦球員、現效力卡迪夫城嘅奧祖（Sheyi Ojo）非常相似；而奧祖亦同樣嚟自倫敦嘅屈福特。其他被視為可能嘅Dide人選仲有基迪亞隊友薩卡、水晶宮前鋒韋費特沙夏、阿士東維拉老將艾殊利楊格等等。
究竟最後Dide會否以真面目示人？定好似藝術家Banksy般一直保持神秘身份？或者要睇Dide本人及唱片公司嘅「市場策略」點處理喇。如果Dide真係基迪亞，而阿仙奴又真係能夠「反Cup」曼城奪冠，我相信佢唔會介意宣告自己真正身份，為球隊重奪失落多年嘅英超而沖喜一番！
(原文2023年5月3日於Now Sports網站上載，現稍作修訂，並改成粵文版本)
