前英超冠軍李斯特城又輸一場！深陷降班危機嘅狐狸，日前主場對利物浦，本應非勝不可，但最終大敗而回，只能繼續留喺尾二位置。昔日無畏無懼嘅「Fearless Foxes」（李城外號），已完全失去狐狸原有靈氣。
只不過係7年前嘅事，李斯特城以Underdog姿態喺英超首度封王，2年前亦捧起球會史上首個足總盃。2年後今天，主力陣容包括占士麥迪臣、迪拿曼斯、哈菲班尼斯、安迪迪等仍留隊；惟球隊開季前放走隊長卡斯柏舒米高，個人認為係最大敗筆。先唔講起用丹尼獲特擔正，已證實係一場大災難；更大問題係，隊中再無另一好似舒米高一樣級數及資歷嘅老將穩定軍心；另一老將華迪踢足大半季後備，自己都自身難保，更遑論帶起全隊士氣。
當年狐狸贏得英超，除靠被低估嘅實力，還靠眾將大踢士氣波。今季狐狸人腳實力其實唔算差，卻踢得死氣沉沉，毫無士氣可言。就算最後請嚟前阿士東維拉領隊甸史密夫救火，但喺佢帶領下迄今6戰只得1勝2和3負，表現依然毫無起色。
如果閣下係李城球迷，當聽住Britpop班霸樂隊Oasis一曲《Falling Down》，再睇住愛隊沉倫，可有感同身受嘅唏噓：「It's falling down on all that I've ever known; Time to kiss the world goodbye……」。早前亦有一隊以AI模擬Oasis主音Liam Gallagher聲線嘅「AISIS」樂隊，發表一批模仿「綠洲」嘅作品《The Lost Tapes / Vol.1》，像真度十足；其中一首《Out Of My Mind》，亦說中李城今季接連「自爆」失分嘅境況：「Another sunny day and I’ve just wasted it away……」
近日有報道指李城將取消年度頒獎禮，間接承認今季已失敗，無謂再頒獎「贈興」；狐狸球迷要有心理準備，愛隊真係有機會繼布力般流浪後，成為另一支降班嘅英超冠軍球隊。餘下兩仗佢哋會對紐卡素及韋斯咸，最後會唔會有奇蹟出現？
(原文2023年5月17日於Now Sports網站上載，現稍作修訂，並改成粵文版本)
