香城最多Fans嘅英格蘭，喺世界盃正式登場，首戰以6︰2大勝「亞洲一哥」伊朗。其清風送爽程度，屬英軍近屆大賽中少見。越睇到最後，不禁令我哼起英國Britpop樂隊Blur名作《Song 2》嘅「Woo-hoo」副歌。英格蘭嘅表現，就同呢首歌一樣，一個字︰爽！
今場比賽，因為英格蘭好早入波，搞到伊朗進退失據，自然令英軍組織攻勢時更得心應手。幫球隊首開紀錄嘅年輕小將比寧咸固然表現出色，佢拍檔迪勤懷斯更係無名英雄，喺中場掃蕩同截擊咗伊朗唔少傳球，亦令背後一對中堅史東斯及麥佳亞壓力大減，麥佳亞更多次上前參與攻門，兼錄得一中楣一助攻嘅優質數據，令一眾曼聯球迷啞口無言（包括我）。
重溫上屆決賽周，英格蘭同樣試過大勝而回（6︰1贏巴拿馬）。一場勝利當然唔能作準，不過比賽中當英軍主攻時，的確比以往更有耐性地搓嚟搓去然後搵到空位破密集；後半段當伊朗嘗試壓前時候，球隊嘅反擊亦頗具威脅，從最後兩球入球可見一班。當然唔能夠馬上因為一場大勝而斷定英格蘭成為爭標熱門，同組餘下對手美國及威爾斯從來唔易對付，但只要一場一場俾心機踢落去，我哋英迷都會繼續撐下去。今天，就俾我哋「Woo-hoo」自High開心一陣啦！
(原文2022年11月22日喺NowSports網站上載，現改成粵文版本)
