世界盃快將揭幕，但呢段時間球壇嘅流量密碼並非World Cup，而係Cristiano Ronaldo。
無錯，一切源自葡葡牙球王基斯坦奴朗拿度接受名嘴皮雅斯摩根訪問，令全世界都感受到佢對曼聯嘅一大堆怒氣同怨氣。C朗嘅指責有無道理﹖抑或一切只為自己﹖就交由球迷們分析判斷，每個人可以有唔同想法意見，最重要係互相尊重，咁樣先係多元社會可貴之處。
所以，筆者雖然係曼聯球迷，仍尊重C朗有佢嘅言論自由。不過說話講出口後，就要承受之後結果。其他嘅唔講，只講當下世界盃，C朗今次訪問，對葡萄牙有無影響﹖主帥費蘭度山度士聲稱同國家隊無關，球隊亦啱啱亦喺熱身賽中大勝尼日利亞，未獲球王朗點名盛讚嘅般奴費南迪斯更梅開二度， 睇落一切如常，好似無乜影響。
當然，一切都要等世界盃開始、C朗上場後先見真章。我哋固然要相信C朗係真正專業嘅球員，唔會再做出早前對熱刺拒絕後備上陣兼提早離場嘅唔專業表現。但對葡萄牙球迷嚟講，也許更擔心C朗會否延續今季喺曼聯嘅力不從心表現，明明所有隊友已落力餵波俾佢，餐士唔多但都唔算少，可惜最終未能好似以往咁轉化成大量入球。球王嘅霸氣，係咪被怒氣、怨氣所影響﹖抑或真係時不予我﹖
C朗喺摩根嘅訪問中承認佢上季差啲加盟曼城；曼城著名球迷、英國Britpop班霸Oasis曾有一首名作《Don't Look Back In Anger》，好適合送俾今天嘅C朗聽。「Don't you know you might find, a better place to play?」好明顯，奧脫福夢劇場已唔再係你表演嘅地方，卡塔爾世界盃足球場，可會係你嘅最後探戈﹖何不趁今次盛事，暫且放下你對紅魔鬼嘅憤怨，喺世界盃中落力展現俾世人知道，你仍然係球王。你今季力不從心嘅表現，都係曼聯害你。你從來無錯，錯嘅都係別人。
（原文2022年11月19日喺Now Sports網站上載，現改成粵文版本）
