英超曼聯又輸一仗！一星期前，紅魔先至打破6年錦標荒捧走英聯盃；估唔到一星期後，竟0:7大敗予宿敵利物浦。平時少聽Heavy Metal，但今日真係要播返首重金屬班霸樂隊Black Sabbath經典《Heaven And Hell》，嚟形容此刻心情！
一場英聯盃決賽、一場雙紅會，但曼聯呢兩仗表現，絕對係天堂同地獄之別。唔通紅魔仍沉醉喺奪冠興奮中而踢得漫不經心？又唔算係，起碼上周中英足盃對韋斯咸嘅比賽仍然上力兼最後反勝。唔通係賽程太密導致球員太疲累？也許係原因之一，但任由紅軍派足7隻光蛋，比賽末段扯白旗完全放棄，無論如何係完全不能接受。唔想為大敗找戰犯，只因全隊上下包括坦夏都要負責。套用電影《毒舌大狀》內黃子華嘅金句對白：Everything is wrong！
「The closer you get to the meaning / The sooner you'll know that you're dreaming」，唔通今季曼聯嘅反彈只係曇花一現，最終都係要夢醒？理性分析，一場大敗失掉英超3分，我哋同第4及第5名（熱刺、利物浦）仍有7分優勢，但得失球由正雙位數跌返去個位數。坦夏今次應會開行風筒，然後落場同全隊一起罰跑圏或其他。我哋曼聯球迷要堅定相信坦夏，相信佢「唔係一X樣」。周中歐霸盃對貝迪斯，全隊必須重新振作起嚟！
（原文2023年3月6日於Now Sports網站上載，現稍作修訂，並改成粵文版本）
