英超曼聯終於捧盃！以2:0有驚無險擊敗紐卡素，贏得今屆英聯盃冠軍。比賽末段全場紅魔球迷高唱《Glory Glory Man United》呢首經典曼聯打氣歌一刻，久違嘅感動又激動場面再一次重現，我都忍唔住眼濕濕！
曼聯對上一次捧盃，已經係2016/17年球季嘅歐霸盃；兩個冠軍相距6年，以英超強隊標準而言並唔合格。但觀乎坦夏上任半季已為紅魔重返正軌兼奪冠，一切又比想像中嚟得快。
今場比賽，其實一開始係紐卡素稍佔優勢，相信同曼聯剛於周中歐霸盃同巴塞隆拿激戰僅勝後、體能回復不及有關；但球員平均質素都係紅魔略勝一籌，卡斯美路頂入開紀錄一球，已盡顯其大賽級數；仲有自世界盃後入球比賀蘭仲要多嘅華舒福，高速入楔小禁區一射彈到對方士哥，盡顯其超級火熱狀態。下半場全隊繼續將士用命，力保領先兩球戰果，坦夏臨完場換入正隊長哈利麥佳亞，俾佢同副隊長般奴一齊捧起英聯盃獎盃，亦非常識做。
實在好耐無喺決賽場上聽到《Glory Glory Man United》喇。呢首歌曲係喺1983年曼聯迎戰英足盃決賽前發表，自此成為球隊招牌歌曲；嗰場決賽紅魔亦喺重賽擊敗白禮頓奪冠。1994年，曼聯搵嚟老牌樂隊Status Quo合作推出另一首歌曲《Come On You Reds》，副歌亦特別加入「Glory Glory Man United」名句。呢首作品當時連奪兩星期英國細碟榜No.1，象徵曼聯盛世正式展開。而曼聯盛世自費格遜喺2013年退休後正式完結。
10年後今天，坦夏可唔可以為球隊重拾昔日聲威？作為曼聯球迷，今天暫且唔討論呢個嚴肅認真嘅問題，就讓我哋盡情播放《Glory Glory Man United》同《Come On You Reds》、盡情享受捧盃嘅興奮吧！
（原文2023年2月27日喺NowSports網站上載，現稍作修改，並改成粵文版本）
