我係幾時開始聽AMK？已經唔太記得喇，都係90年代初吧。當年睇《年青人周報》樂評介紹，然後喺CD交易所平價買到樂隊《Love EP》，碟內充斥住Nosiy／Shoegazing／C86電結他風格，成為當年獨一無二嘅Indie標誌，亦對當年初聽英文歌無耐嘅我嚟講非常震撼：原來香港都有樂隊，玩到好似外國Band一樣咁正。
90年代初，香港主流樂壇Band Sound風氣已完全消退，反而Indie音樂圈開始活躍，AMK係其中一對Icon樂隊，更係少數唱中文嘅Indie Band。歌曲Credit無寫明，但相信主要係阿松同Anson負責填詞，阿琛專心玩結他Feedback；當然唔可以遺漏鼓機玲玲。
AMK嘅歌詞寫得非常好。或者應該咁講，佢哋嘅歌詞（同音樂），完完全全帶出樂隊嘅鮮明Character —— 反建制、關注弱勢小眾、堅持自我、真善美；有時會有少少中二病，但未致於過份消極，反而會努力去理解、接納自己嘅不足。
AMK由1989年第一代Adam Met Karl開始，到1996年發表《勁歌金曲大雀局》專輯後解散。短短唔夠10年歷史，創作及發表過多首經典歌曲／E.P.／專輯。主流Cantopop樂迷未必認識佢哋，但你問每一位Indie樂迷，都一定知道、並同意AMK係經典。
AMK過後，阿松有份創立維港唱片，為My Little Airport、False Alarm、22 Cats等推出唱片。期間佢同Alok組成「人頭馬」，一首《骷髏舞》好鬼正，至今我仍然記得點唱。維港亦發表過一張AMK致敬專輯，阿松同人頭馬翻玩返自己首經典金曲《浪漫是您的本性》。
我第一次同阿松見面，係維港唱片醞釀組成前一場工廈Gigs。嗰晚除咗My Little Airport、False Alarm同22 Cats，仲有Dylan Art、The Marshmellow Kisses、Pixeltoy等演出。阿松話有睇我《mcb》嘅樂迷文章，彼此開心交流音樂心得。後嚟大家斷斷續續都有碰面，都係喺音樂會，或圍繞音樂嘅活動；後期佢亦有向我推介朱凌凌同K-Pop。
不過，我最記得阿松當年喺《mcb》推介英倫樂隊Jack；而Jack最終成為我人生其中一隊最愛樂隊。嗰時候，佢仍然用筆名Indian Mary，之後用返真名關勁松。我亦好記得佢曾瞓身推介「粉紅A」，當年我唔識貨走寶，到近年先正正式式愛上。當然，仲有佢同亞里安主持嘅「不設劃位」電台節目，幾乎每個星期我都乖乖留喺屋企收聽。
阿松從來無停低過佢嘅音樂步伐。友人今日告之，原來2017年佢有隊樂隊叫「時針」，一首《灰九》好沉重但好好聽，「你總有一些束縛／會令到你挫敗／但活過了卻會很痛快／因這根本是你」。2021年佢再組成「關勁松的Astrology」，處女作《La La Hey Hey歌》啲結他音牆依然厲害，歌詞亦一針見血：「我們活在精神病院裡／院長充斥荒謬的真理」。雖然一切彷似預計之內，仍係一首上乘作品。
呢兩年嚟，「關勁松的Astrology」間斷地有發表新歌，阿松筆下嘅歌詞，就同30年前AMK嘅佢，並無分別。He’s a true PUNK，從一開始到今日，一直無隨波逐流，忠誠地做自己，十分之唔簡單。佢本人最能代表《浪漫是您的本性》一句歌詞：「仍願你能，保持自我風格。」忠於自己，其實真係好少人做得到。
我最喜愛嘅AMK歌曲，應該係《燦若繁星》。阿松喺歌中變咗一個乖乖仔，細訴著佢對冰心嘅敬仰同愛，「呢個世界好似太多罪惡發生，但係喺冰心嘅書裡面，佢成日提倡真善美」。阿松同AMK雖然反建制，面對世界好多荒謬不公事情都睇唔過眼，但內心深處，佢仍然相信人有善良一面。如果未來有一天，有中學生喺學校歌唱比賽攞起結他自彈自唱呢首歌，「是你賦予我勇氣，令我繼續前行」。如果阿松知道，一定會好感動。
阿松，May you stay forever young。
