本周英超，升班馬諾定咸森林將會喺主場迎戰榜首曼城，牌面睇確實強弱懸殊，但未必無得踢。全因森林踏入2023年後表現突飛猛進，6場英超賽事3勝2和1負，合共取得11分（唯一敗仗係上周作客不敵富咸），成功令球隊離開降班區，升至中游地帶。何解森林喺新一年有咁大改變？或者同佢哋做咗呢件好事有關……
唔知大家有無留意，森林升班後，球衣未有印上Logo。據知係因為球隊未能同原本贊助商傾妥新續約條件，便一直懸空。去年年尾，森林宣佈同聯合國難民署（UNHCR）合作，由2023年開始，球員將穿上印有UNHCR標誌嘅波衫作賽，更捐款支持呢個國際人道救援組織。
做好事，有好報，呢個可能就係森林踢出全新精神面貌嘅關鍵。期間就算今季表現突出嘅借將甸軒達臣不幸受傷，卻估唔到「因禍得福」、從巴黎聖日耳門借到世界級門神基羅拿華斯來投救火，佢喺之前對列斯聯一仗東飛西撲，助球隊小勝全取3分。
森林喺英倫球壇歷史中，算係二線強隊。70年代末80年代初最風光，試過蟬聯兩屆歐冠盃（等同今日嘅歐聯）；90年代亦出產過堅尼、哥利摩亞等性格球星。球隊自1999年降班，事隔23年先重返英超，惟季初表現麻麻，一直徘徊榜末；直至獲聯合國難民署「加持」後，成績漸見起色，實在可喜。我諗起90年代英倫樂隊Embrace，佢哋同森林相似，屬二線Britpop Band，不過都有過一首名作《All You Good Good People》，歌名好適合形容森林今次好人好事。歌曲當年最高升至英國細碟榜第8位；以森林現時實力，今季未必能排喺英超第8位，但不妨以此為目標努力，用心踢好每一場比賽，早日脫離降班漩渦！
（原文2023年2月18日喺NowSports網站上載，現並改成粵文版本）
