歐洲國家盃外圍賽第1輪賽事，最矚目當數意大利主場迎戰英格蘭，呢場兩年前歐國盃決賽「翻版」，結果英格蘭成功復仇，以2:1勝出。比賽中再次展現英軍近年進步及堅毅，表現令人欣慰；但如果時光可以倒流， 將今場戰果跟上次歐國盃決賽互換，咁就好喇……
今場賽事，作客嘅英格蘭上半場踢得異常積極，開場無耐即憑角球攻勢，迪勤懷斯近門射入領先；完半場前因意軍禁區內手球獲得12碼，個人認為呢球有爭議空間，可判可唔判，亦反映現今球例改嚟改去，實令球員同球迷無所適從。
無論如何，英軍憑隊長哈利簡尼順利射入12碼，帶住兩球優勢返回更衣室。豈料下半場形勢大逆轉，兩位曼聯球員差啲成為輸波罪人 —— 先係麥佳亞後場交失波，導致意軍利迪古追番一粒；其後勞基梳爾兩黃一紅被逐離場，令英格蘭人少打人多，幸好眾將一人走多一步，力保不失至完場，成功打響頭炮，兼一雪前恥。
英格蘭贏波，固然值得高興；但我哋三獅球迷實在難以忘懷兩年前嘅傷痛。如果有得揀，我寧願今場輸波，交換兩年前歐國盃決賽互射12碼落敗嘅戰果；畢竟英格蘭自1966年後，便從未喺大賽揚威。
當然，以上不過係我嘅Fantasy而已，就算真係回到過去改寫歷史，以英格蘭嘅命數，隨時只會像電影《連鎖蝶變》（The Butterfly Effect）男主角一樣越改越衰。唯有聽回電影（其中一個結局）完場曲、樂隊Oasis名作《Stop Crying Your Heart Out》安慰自己：「You'll never change what's been and gone……」亦唯有樂觀去睇，兩年後今日呢隊英格蘭，的確唔再好似以前咁保守龜縮，劣勢中亦能頂住壓力，佢哋值得我哋繼續支持下去。
（原文2023年3月24日於Now Sports網站上載，現稍作修訂，並改成粵文版本）
