今季英超護級戰況緊湊，曾有一段時間，聯賽榜下半版球隊都捲入降班漩渦；直至近一、兩輪賽事踢完後，形勢開始見明朗，預計降班球隊應離不開榜末修咸頓到第15位韋斯咸之間。榜末3支球隊聖徒、李斯特城同諾定咸森林近來越踢越沉，而家只餘下7場賽事俾佢哋翻身。
其中以修咸頓嘅情況最令人擔心；論人腳佢哋唔及李城好，主場威力又唔及森林（雖然對方剛輸俾曼聯）。事實上，聖徒最近賽程太惡啃，前3仗分別對上曼徹斯特雙雄及鶴臣復出領軍後大旺嘅水晶宮，最終只搶得1分；本周末又要作客榜首阿仙奴，實在不容樂觀。
聖徒今季最錯地方，係錯信前領隊尼芬鍾斯，佢上年11月接任哈辛赫圖，喺執教短短95天入面，8場英超1勝7負只得3分，連累球隊一直留喺降班區。就算看守領隊西耶斯接任後，一度令球隊有所起色，但今日嘅聖徒，已唔似當年青訓人才輩出（加里夫巴爾、梳爾、張伯倫），買人眼光又獨到（文尼、泰迪、雲迪克）；本來係穩定先生嘅隊長獲特包斯今季亦穩定不再；如此平庸人腳陣容，要殺出重圍護級成功，談何容易？
筆者算係半個修咸頓球迷，全因我最喜愛嘅球員，就係聖徒史上最偉大球員拿鐵斯（Matthew Le Tissier）。睇返球隊自2012年重返英超自今，曾多次面臨降班危機但都成功全身而退；今年情況的確比過往危危乎，但如果而家就放棄，就唔使再踢落去啦。今日，無論係球隊上下，以至球迷，都需要一鼓作氣、力戰英超至最後一刻，先可以將唔可能變成可能。我哋需要聽著修咸頓名人球迷、英國R&B歌手Craig David嘅《Ain't Giving Up》為自己打氣：「When the going gets tough / Just remember it's me and you for life / Ain't giving up on you」。衷心希望聖徒最後能逃出生天！
(原文2023年4月19日於Now Sports網站上載，現稍作修訂，並改成粵文版本)
