最近成日聽返陳百強嘅歌，佢啲歌的確好多都好好聽，旋律好靚，歌詞簡潔，意境深遠。亦因此睇返好多佢當年嘅訪問、節目，以及有關佢死嘅報道。
我好鍾意Danny其中一首歌《盼望的緣份》；論流行，一定唔及得上《偏偏喜歡你》、《今宵多珍重》、《當我想起你》、《深愛著你》、《漣漪》、《幾分鐘的約會》呢堆經典情歌。早排睇咗佢當年一個音樂特輯《感情寫真》，節目入面播完由「阿梅」梅艷芳同何超瓊客串做女主角嘅《深愛著你》MV之後，緊接Danny一段愛情自白：「成三十歲啦，都仲係寡佬一名，同時未曾試過談戀愛……」呢段說話令我印象好深刻，突然間，我有一種感覺，原來Danny唱咁多痴心情歌，乜嘢「曾在我心，如此深深」、「愛已是負累，相愛似受罪」、「心中想你，如今想你，懷念昨天的你」……無論佢唱得幾情深幾肉緊都好，對佢自己嚟講，其實係一種諷刺。越唱得多情歌，只會令佢越痛苦、死更多細胞；《盼望的緣份》先係佢嘅心聲：「自己孤單，還要天天唱著情歌」先係佢嘅寫照，嗰份憂傷、無助同盼望，唔係扮出嚟，亦唔係填詞人鄭國江求其寫出嚟，而係真真正正發自Danny心入面嘅孤單。
《感情寫真》入面，Danny請嚟好多圈中朋友做嘉賓，節目度唔止一位，包括阿梅、「發哥」周潤發等，都不約而同咁講：「Danny係一個好需要人錫嘅人。」發哥仲話：「你快啲笑吓，寬容啲啦。」一個成日唔笑、需要人錫、需要人愛嘅人，代表佢生活究竟係開心定唔開心佔多數？睇完成個音樂特輯、睇完Danny對住鏡頭嘅獨白、佢同咁多位藝人朋友傾偈、佢嘅姿態神情，我感受到，佢係偏向唔開心居多。
陳百強當年係咪患咗抑鬱症？八十年代有無人談論抑鬱症？Danny係咪一個超完美主義者？佢係咪因為對自己要求太高，最終頂唔順爆煲？佢做藝人歌手，要面對幾多閒言閒語、流言蜚語？佢每一分偏差，全受到注望，心入面究竟背負咗幾多壓力、幾多重量？係咪一句「食得鹹魚抵得渴」就可以輕輕帶過？有人患咗抑鬱症，係咪輕輕一句「抗壓能力差」「無做生涯規劃」、「死係解決唔到問題」、「大把人慘過你，佢哋都未死，你做乜要死？」就可以解釋晒？我哋呢個社會，究竟有無嘗試真正去關心、了解情緒有問題嘅人，以至而家呢一代年輕人，心入面諗緊啲咩？
曾經患抑鬱嘅旅遊寫作人薯伯伯話，最有效嘅方法，就係用心聆聽佢哋嘅感受。呢段日子，我一直努力聆聽陳百強嘅音樂，嘗試了解佢嘅感受。填詞人向雪懷講，佢填嘅《我的故事》，係Danny最愛嘅自己歌曲。「問，可否感到，給你望見到的，不是我？」唔止Danny，我都覺得寫得好中。平時我哋睇嘢，往往只係用眼去睇，而唔係用個心去睇。我嘗試用個心去聽Danny嘅音樂，然後我發現，當我再聽《偏偏喜歡你》、《今宵多珍重》、《當我想起你》、《深愛著你》、《漣漪》、《幾分鐘的約會》時候，我開始感受到Danny同樣係用個心去唱呢啲情歌，雖然歌詞講嘅痴情愛情，未必係Danny感同身受經歷。但我發現，Danny係用佢心入面嗰份孤單、盼望去唱出嚟，所以呢啲歌仍然充滿感情，仍然係經典。嗰一份諷刺荒謬嘅感覺，亦隨之消逝。
「我自己始終都係一個好感性嘅人，我喺孤單嘅日子，實在好需要有一個伴侶，可以同我分享我嘅成功、我嘅唔開心……」呢段係Danny喺《感情寫真》入面愛情自白嘅下半部。阿梅發哥講得無錯、Danny佢自己都知道，佢係好想有人錫佢。Danny另一首經典《長伴千世紀》唱道：「此際在眼裡只得你，笑語體貼入微。你的言辭姿態神情，從未和我分離……忘了憂，忘了悲，陪著天天也歡喜。留你心，留我心，長伴千千世紀……」我相信Danny心入面盼望嘅另一半，正正係歌詞中所描寫嘅「你」。呢一個「你」，唔止係另一半，可以延伸至屋企人、朋友、師長……乜嘢身份都好，總之佢係一個關心你、俾你呻、願意聽你個心講嘢嘅人。「不如我哋試吓，搵出個問題喺邊度吖？」問題可能最終都解決唔到，但起碼，我哋唔再係孤獨一人作戰。
