早晨。試當真臨別在即，佢哋嘅重頭告別作《墨魚遊戲2&3》，這陣子引發全城熱烈討論；不過我今日想講佢哋另一齣告別作，《Uber爸爸4》。
溫故知新，第一集《Uber爸爸》發表於2020年11月，屬試當真早期佳作，亦係我最愛嘅試當真作品之一。以當日疫情人人戴口罩為背景，講述一個老套不過、卻是跨世代共同擁有及共鳴嘅主題——隔膜和溝通。理應最親密嘅父母同兒女，往往唔會彼此對望講真話，卻只能夠同互不相識嘅陌生人坦誠吐心聲。
《Uber爸爸》當年嘅View數其實唔算好，惟意外地接連推出續篇，甚至外傳，相信試當真自己應該幾鍾意呢個系列。老實說，《Uber爸爸2&3》我唔算太喜歡，覺得都係重重覆覆扭同一條橋；外傳講阿仔遇上FBI靚女乘客就幾好笑，亦幾浪漫；同埋結尾首歌《Supalonely》（BENEE Feat. Gus Dapperton）好好聽。
來到結局篇《Uber爸爸4》，毫不意外用上最老套不過嘅溫情結局——阿爸同阿仔終於大和解，就連外傳女主角黃小姐都有BBQ大團圓回歸。不過結局唔係最重要，過程先係。
《Uber爸爸4》最令人拍案嘅地方，無疑係大玩意內言外Double Meaning：「我認錯（人）」同「我認錯（對唔住）」。在錯有錯著下，令兩父子出現和解契機。一句「認錯、對唔住」看似簡單，卻永遠係最難講出口。但原來講出口之後，可以有助解決好多問題。
當然，《Uber爸爸》系列一對父子主角由疫情時已開始互片「死老嘢」同「仆街仔」，要令二人真正和解，一句「認錯、對唔住」並唔足夠。所以結局篇提出一個重要命題——「隔膜」。
一直而嚟，《Uber爸爸》兩父子每當戴上口罩，就唔會認得大家（設定非常荒謬，但放在當日更荒謬嘅疫情時代氛圍，卻帶出極佳諷刺效果）。口罩為佢哋帶來隔膜，同時令佢哋打開心窗，展現自己心底裡坦誠一面。來到結局篇，二人終於知道彼此雙重身份，卻由此反思呢一片口罩「隔膜」嘅意義，成就佢哋最後「好返」和解之道。
其實不止是父母子女，其他親密關係如情侶、夫妻等，Keep住少許隔膜、保留少許私人空間，隨時可以讓大家相處得更舒服、更和諧，頗有儒家「發乎情，止乎禮」嘅大智慧，勁！
我之所以喜愛《Uber爸爸》另一重要原因，是它活靈活現、呈現出當日那個荒謬絕倫的疫情時代。疫情，起碼對我而言，是「不想回憶、未敢忘記」的烙印。那段日子，實在發生太多太多違反Common Sense、違反人性的荒謬事情，至今仍令我難以忘懷及釋懷。
今天，當我在《Uber爸爸4》中看到「死老嘢」爸爸仍繼續戴著那個Face Shield，除了好笑，還帶點苦笑。不過最後爸爸決定除下口罩，是否代表他終於也學會放下呢？
對我而言，整個《Uber爸爸》系列，亦記錄著這些年來我對試當真的感覺。從第一集的驚喜，到第二、三集的重覆和失望；來到最後第四集，我嘗試對試當真多一份理解。無錯我其實已有好一段時間沒怎樣看他們的作品，但這幾年來阿修、許腎同豪哥經過幾多高低潮，我們旁觀者又理解到幾多？但起碼他們呢五年以來，真的透過Channel不斷嘗試不同事情，當中縱有失準及爭議，起碼仍能貫徹三子開台時「認真試下，試下認真」的宗旨，這方面我是十分佩服，及欣賞。
2025年10月26日試當真收皮這一天，阿修、許腎及豪哥，不知會否再次聯同Locker及火柴，發表《再見豬豬2》呢？這裡先跟他們說一聲：「多謝。」
