「南方書店」並非唱片店，佢亦唔係100%書店，反而更近似書店+文具店，同時兼賣卡式帶、模型玩具等等；中秋節前，門外更會掛滿一排排燈籠擺賣。
「南方書店」有兩間分店，一間位於譚公道，另一間喺馬坑涌道。印象中譚公道店比較細、主力賣書同文具；馬坑涌道店比較大，擺放更多模型玩具。但兩間一入到去，仍會聞到濃濃書卷味，以及文具味。
而卡式帶，通常放喺書店入口櫥窗最醒神位置 —— 80年代，流行音樂屬大眾普遍娛樂，但當年已因為土地問題，未必所有人屋企有黑膠唱盤。相比之下，卡式機較慳位，大部份亦附設收音機功能，所以當年幾乎家家戶戶都有一部，連帶令流行音樂Cassette大有市場；本身並非唱片店嘅「南方書店」，自然湊熱鬧賣埋一份。
「南方書店」賣嘅Cassette數量不算多，通常都係賣嗰一期最Hit嘅歌手樂隊。點解我咁有印象？原因只有一個，佢哋盒帶售價，不時比正統唱片店平一、兩蚊。
千祈唔好睇少呢一、兩蚊，對嗰個年代零用錢唔多嘅學生或後生仔嚟講，非常重要。當年我就係因為慳家，喺「南方」買過好幾餅盒帶，包括達明一派嘅《達明一派II》及《我們就是這樣大的》，仲有陳百強《凝望》。
當年我幾鍾意陳百強，《凝望》係我最喜愛嘅Danny專輯，同名點題曲《凝望》嗰份輕盈浪漫，我敢講直至今日，仍然無一位香港歌手或樂隊，可以做到呢一份感覺。
我亦記得，Danny喺《凝望》MV入面，最後同女主角上到山頂，佢講嘅一句說話：「香港真係好靚。」
除咗Cassette、唔計文具，其實我喺「南方」買得最多嘅係小說，包括十幾本明窗版本衛斯理如《連鎖》、《命運》、《鬼子》、《尋夢》，以及達明一派早年御用填詞人陳少琪嘅散文集《上路》等等。
有時我都會去「南方」打書釘，但始終屬街坊書店地方較細，都唔係太意思好似去誠品咁，打足一個下晝書釘仍面不改容。
而家諗返，好似「南方書店」呢一類多功能書店，係咪有啲似迷你版誠品？相信當年港九新界十九區，區區都會有一兩間類似嘅街坊書店，成為我哋年輕時候成日流連嘅地方。每次去都期待有新發現，感覺新鮮。
「南方」兩間分店多年前早已結業，無話可惜定唔可惜。又或者咁講，而家仲有幾多人成日會逛書店、文具店，以至唱片店？
消費及娛樂時代巨輪不停轉，無話邊個年代更好或更差。就算真係不斷變差，又可以點？我哋根本唔可以令巨輪停落嚟。
我嘅「南方書店」Shopping List：
陳百強《凝望》
陳百強《痴心眼內藏》
達明一派《達明一派II》
達明一派《我們就是這樣大的》
衛斯理《連鎖》、《願望猴神》
衛斯理《命運》
衛斯理《鬼子》
衛斯理《尋夢》
陳少琪《上路》
