世界盃正式進入淘汰賽階段，英格蘭喺16強以3︰0輕取塞內加爾。是其是非其非，英軍今仗的確踢得好好，尤其睇見一眾新星出色表現，終令我感受到球隊嘅新勢力正上升，準備接舊人班，就如樂隊Suede名作《New Generation》中唱道︰「Like a new generation rise！」
今場比賽，一開始已見英格蘭比以往進取，曾多次組織傳中，可惜中路無人接應。上半場中段輪到塞內加爾發威攻咗一輪，好在碧福特一球神救穩住軍心，然後就見隊長簡尼一個靚直線交俾22號新星比寧咸左路插入，再一個靚傳中，中老大哥軒達臣12碼點接應，熨射破網。
英軍先開紀錄後，自然好踢好多。臨完半場前補時，比寧咸截到塞軍攻勢後隨即帶領打反擊，一扭一傳成功交俾20號新星霍頓，塞軍來不及回防，霍頓再傳給簡尼單對單面對門將文迪，射左射右任君選擇，隊長終告開齋。下半場，英軍繼續㩒掣，霍頓左路一推即過，傳中俾17號新星薩卡門前輕鬆射入，3︰0大局已定。
英格蘭頭兩球入球，可以見到隊中新人同舊人完美配合 —— 無錯，簡尼同軒達臣已經係「前輩級」；埋齋一球就真正由新星主導。「It's like a new generation calling / Can you hear it call﹖」2022年呢隊英格蘭，人腳比以往更平均，新人正式上位，舊人仍然有掟企。下輪8強對法國，相信會有好戲睇。最大擔憂係邊個負責看管大勇嘅安巴比……肯定唔會係麥佳亞啩！
（原文刊登喺2022年12月5日Now Sports網站，現改成粵文版本）
