實在難忘一年前第一次聽到本地獨立樂隊 WHIZZ《Let's Keep Dancing Tonight》嗰份感覺──由鼓手Jess同低音結他手Bowie合組緊湊嘅Groovy Rhythm、結他手Moo一手有型Guitar Chord & Solo彈奏，配上主音王雨山嘅文青Vocal，後段更有浪漫到殺死人嘅色士風出場，同電結他鬥搶風頭……所有元素溝埋一齊，成為一首別具一格嘅清新Groovy流行曲，如果王雨山喺某啲段落可以唱得更加「鬼食泥」，相信效果一定更正。
咁樣唔算吹毛求疵，而係覺得WHIZZ已做得非常好，同時可以做得更加好。
清新Groovy-Pop
後來再聽返佢哋第一首細碟《Summer Sea》，原來係樂隊兩年前成軍無耐、為參加比賽而寫嘅第一首作品，最後攞到青年組冠軍，為佢哋夾Band打下一支強心針。《Summer Sea》正式錄音版請嚟李拾壹參與監製，感覺就跟《Let's Keep Dancing Tonight》一樣正斗，節奏感強，但又清新不落俗套。自此便不時留意佢哋嘅動向蹤跡。
勤力玩ig出碟
WHIZZ被歸類為Indie樂隊，但佢哋唔會因為呢個身份而過份低調，相反感覺幾親民，四位成員會一齊拍Youtube Vlog分享夾Band生活點滴、拍Q&A同歌迷互動。就算舊年受疫情影響，都見樂隊不時出動玩Live（公開或非公開），保持曝光同狀態，十分勤力。早排佢哋更上電視同謝安琪Jam歌，帶嚟唔少迴響。
讚WHIZZ勤力，係因為佢哋出道咁短時間，最近已推出首張專輯《之所以我們都在水底里歇斯》，樂隊親力親為擔任監製、錄音等工作。從曲目編排、曲目命名，以及CD Booklet內每Cut都附有一小段引言描述，都聽 / 睇得出呢張係一張概念專輯，為聽者營造一趟水底旅程，俾我哋有過一刻逃離現實，置身喺WHIZZ嘅深海之中，盡情感受佢哋嘅音樂世界。
情緒出路發泄
人有喜怒哀樂唔同情緒，所以WHIZZ喺新碟入面，除咗收錄早已聽到滾瓜爛熟嘅《Summer Sea》同《Let's Keep Dancing Tonight》，以及《Reality》呢類佢哋拿手嘅Groovy-Pop之外，同時亦努力為樂迷呈現樂隊唔同音樂面貌。出碟前最後一首派台歌《Sorrowful》（雞蛋蒸肉餅嘅Soni有份監製），名符其實係一首傷感慢板，初聽好似覺得一切太理所當然，無乜驚喜；但慢慢聽落嗒落係有啲味道。個人認為Moo心思細密同情感多變嘅電結他彈奏居功不少，配上歌詞嗰份無力感：「Nothing I can change / Who gonna set me free, I can't go anywhere」，很容易牽動聽者情緒，投入其中，感同身受。純音樂《Interlude》亦再次展現佢嘅結他才華，全曲短短數分鐘有幾個轉折位，佢都處理得好順同得心應手。
《With the Flow》係WHIZZ早期作品，樂隊Youtube Channel第一條發布短片，就係呢首歌嘅初代Live Session。專輯正式版本減去Groovy味道，變成徹頭徹尾嘅清新Guitar-Pop，個人認為更切合歌曲本身個Flow。呢類文青小清新風格，亦同WHIZZ嘅形象好匹配，偶一為之，非常悅耳動聽。
一發不可收拾，然後收拾心情向前走
不過好明顯，WHIZZ唔會甘於做一隊文青小清新樂隊，佢哋亦不止於此。完場曲《之所以我們都在歇斯》無疑係全碟最具野心之作，感覺同碟入面其他歌曲有好大分別，分別唔止係歌詞上（唯一一首廣東歌）同音樂上。音樂上，開首由Jess同Bowie合組沉穩嘅Rhythm Section，Moo嘅結他開首彈得好隨心，王雨山嘅vocal亦融入成為樂器一部份，編曲漸漸走向Free-Form演奏，再引爆後段嘅暴烈Jamming高潮位，技術同鋪排上可唔可以再好啲？當然可以，未來WHIZZ絕對有能力做得更加好，不過呢一切都唔係最重要。《之所以我們都在歇斯》呢首歌，係今日WHIZZ嘅一篇Manifesto，宣告佢哋可以有好多變化同可能性，而家呢一刻，只係正式開始。「當一切是天注定 / 沒究竟 / 沒人性」，呢個世界就係咁，nothing I can change 。情感上，《之所以我們都在歇斯》俾到我哋每一個人一個釋放位置，你心入面諗到嘅，有乜嘢鬱結、放唔低嘅都好，與其逼自己唔開心，不如嘗試透過一啲方法，例如透過呢首歌5分09秒內盡情發泄。嫌太短唔夠時間？唔緊要，可以按Repeat制不停播放，又或去睇WHIZZ嘅Live，我相信佢哋嘅現場版本會更精采。WHIZZ隊名由來意思，係代表好快、一剎那就過；但一剎那都可以睇到永恆。
請好好記住投入聆聽《之所以我們都在歇斯》呢一份感覺，好好放喺心底裡。回到水面後，我哋要繼續努力如常生活。WHIZZ選擇玩音樂，你呢？
