坦言當初留意到香港作家「理想很遠」嘅推理短篇《0037》，乃因作品獲得「第21屆台灣推理作家協會徵文獎」首獎，後來發現今次原來係佢第一次寫推理故事。《0037》呢個名亦充滿想像空間 —— 唔知係咪啟發自陳浩基經典推理小說《13．67》呢？
讀完之後，我馬上想到嘅，唔係陳浩基，而係宮部美幸。
《0037》推介文案如此寫道：「論一個城市嘅道路同地方知識，的士司機可以話係無人能及。才叔喺後座執到乘客遺落嘅舊手機，本想攞去變賣，卻不斷收到奇怪訊息：3個小時之後，如果見唔到手機主人，發訊息嘅人就會輕生。隨著時間過去，傳嚟嘅訊息越嚟越緊迫逼人，才叔可唔可以靠的士司機嘅智慧同極少嘅線索救到人？」
《0037》有趣在於，故事設定可歸類為日常推理，但加入「有人可能會死」情節，加添一份緊張懸念。故事發生喺一個晚上，描寫推進仿如實時進行，而主角才叔嘅推理任務，就係阻止一宗有可能發生嘅命案發生。如此故事安排，同荷里活電影《駁命來電》（Cellular）有異曲同工之妙。
小說中，每一段新Whatsapp訊息，都代表一個新線索，提示才叔去邊度搵人，推理過程中涉及香港地理、節日紀念日、食物、姓名……皆屬非常生活化元素。關於香港地理部份，出現唔少我城地區、商場及街道名稱，亦有輕輕觸及的士司機操守嘅社會性問題，香港人讀起來自然份外投入，但相信海外讀者亦會覺得有趣，或者會啟發佢哋諗：如果故事背景改成自己住嘅城市，當中嘅地理元素又可以點玩呢 —— 呢個正正係《0037》成功之處，既充滿香港本土特色，同時又可放諸世界唔同國家發生，就如《駁命來電》都曾被改編成港產片《保持通話》；維基資料顯示仲有印度同馬來西亞版本。
而我最喜愛《0037》嘅地方，就同我喜愛宮部美幸推理小說嘅理由一樣 —— 宮部姨姨筆下嘅查案主角，通常係平凡小市民，而且大部份皆有一顆良善嘅心；理想很遠筆下嘅才叔，就是同一類人。固然，推理小說往往強調合理性，比賽評審亦提及《0037》嘅不足，不過我個人認為呢啲都係沙沙石石，創作總離不開Fantasy，總會滲入作者本身價值觀及願望。才叔嘅救人動機係乜？答案好簡單：佢係一個好人。就如《駁命來電》男主角基斯伊雲斯（Chris Evans），不惜一切拯救被綁架嘅女主角金碧辛嘉（Kim Basinger）。
如果你同我一樣，願意相信呢個荒謬不堪嘅世界裡面，仍然有好人，就會明白並了解才叔所做一切，其實非常合理。才叔「就係一個普通的士司機。呢座城市有四萬個」。衷心感謝理想很遠，寫出《0037》呢個善良推理故事。
「能夠以一個關於香港、關於良善嘅故事入圍獲得認可，對我嚟講意義非凡……我會以此作為起點，努力學習如何寫出優秀嘅推理小說，成為一個更全面嘅作者、一個更好嘅的人。」我相信你可以嘅。
