感謝 ＠musikopp 舊年喺IG提到李欣芸（CinCin Lee）嘅《國際漫遊》，驅使我搵返呢隻CD重溫。我發現，原來我一直好鍾意佢，不過一直無講出口。
我連當日點解買《國際漫遊》嘅原因都唔記得喇。為咗寫呢篇文章，我上網搵返呢張專輯嘅資料，先知道當年推出時候，唱片公司滾石特登採用另類行銷策略－－唔出廣告宣傳、專輯一開始只喺誠品開賣、另開設網站令CinCin可以直接同樂迷互動交流，成功營造一份既神秘但親切嘅感覺。而家諗返，可能當日我正正係因為呢份神秘感而買呢張CD。不過嗰時我唔知道佢開咗網站，如果唔係，我應該有好多問題想問佢。
《國際漫遊》喺2005年面世，係李欣芸第一張創作專輯，亦係佢唯一一張有旋律歌詞主唱嘅專輯。出呢張碟之前，CinCin已經係台灣主流樂壇著名監製，亦負責過唔少電影配樂。之後，李欣芸繼續主力喺OST同音樂製作範疇，亦推出過數張Solo，都係純音樂演奏。
喺李欣芸多年嚟嘅音樂歷程入面，《國際漫遊》非常獨一無二（當然佢年輕時同林瑋哲、金木義則及李守信組成嘅Baboo，都係一隊奇葩樂隊）。點解呢張專輯會出現，然後成為可一不可再嘅經典？
《國際漫遊》全碟，都散發住一份濃濃爵士同古典氣息，配上流行曲旋律，可以講係Jazz-Pop最佳示範。完場曲《草》就係最佳例子，跳躍唔定嘅爵士演奏、CinCin隨心所欲嘅演繹，或未致於去到Free-Jazz境界，但已經好接近。開場曲《Drive》喺紮實而重覆嘅和弦演奏下，漸漸滲入爵士味道。《扯亂》喺慵懶嘅Laid Back Jazz氛圍背後，音樂仍然一絲不苟地圓滿。
古典嘅痕跡，主要出現喺全碟嘅弦樂編排，好似《鬥魚》、《Gentle Rain》、《So Cold》、《Sunday Blue》、《走到這裡》都擁有動聽嘅弦樂演奏。《Gentle Rain》同之前一曲弦樂樂章《前奏曲》相互融為一體，真係會令人以為《前奏曲》就係佢嘅前奏。《So Cold》更以弦樂配上電鼓節拍，兩者撞出嚟好有化學效果。李欣芸當年係遠赴美國錄製呢張專輯，弦樂部份更請來大名鼎鼎嘅波士頓交響樂團負責。呢方面嘅故事，傳媒以往已有談論；滾石當年亦有用呢個做宣傳賣點（仲有格林美得獎音樂人Bob Clearmountain擔任混音、名設計師蕭青陽操刀專輯嘅美術設計）。
可以講，《國際漫遊》喺音樂技術及錄音層面絕對無可挑剔，完全擁有Hi-Fi天碟一切必備條件，包括李欣芸嘅Vocal。但呢隻碟最終無被追捧為Hi-Fi天碟，並不覺可惜，亦根本志不在此；我只為滾石至今仍未將《國際漫遊》再版而感到可惜，呢隻碟絕對值得獲重新印製成黑膠（當年只出CD），放喺唱盤上俾樂迷細味聆聽，永遠流傳。
從一剎那睇見永恆。喺滾石嘅宣傳文案入面，寫住「與其說《國際漫遊》是李欣芸的首張創作專輯，不如說她像一本個人旅行手札」，事實上呢張CD嘅包裝設計，的確設計成一本筆記簿咁樣。呢張CD係CinCin嘅人生一次重要記錄。據知大部份歌曲係佢喺1995年遠赴美國波士頓柏克萊音樂學院進修期間寫下。「坐困愛情、懷疑生命。」CD入面嘅文案咁樣寫。懷疑人生就去散步，李欣芸選擇去外國、去駕車，仲有寫歌。《國際漫遊》嘅英文碟名係Drive，《Drive》歌詞下嘅CinCin，就係一位「放肆的Driver」：「那是誰／從身邊經過／逗留多久在眼裡／終於溜走」。驟眼睇好灑脫，但同時仍然帶住迷惘。
《鬥魚》據知係欣芸19歲時創作嘅歌，歌詞雖唔係由佢親自填，但確實寫出青春嘅噪動不安。然後到《So Cold》，更加單刀直入，描寫一段唔應該出現嘅愛情，令佢困惑到「是不是我，連自己都不認得」。緊接嘅《走到這裡》，歌詞上根本係《So Cold》下集：「走到這裡／才發現失去一個人／像失去體溫／不只一點冷」。更徹底嘅領悟係《寫在雲端》，出自法國諺語「 C'est écrit dans le ciel」，英文譯成「Written in the sky」，人生嘅因緣際遇，一早已寫喺天空上。所以我哋懷疑人生時候，最有效方法應該係望住個天（打卦）！
但其實，CinCin喺《扯亂》（Trouble Mind）已道破一切：「到底那是誰／我不需要人陪／愛和我作對／顛倒所有是與非」。原來一切都係庸人自擾，自己呃自己。喺慵懶嘅Laid Back Jazz氛圍背後，話俾大家聽點樣由糊塗學識難得糊塗。「路在林間分道。而我，步上了人跡罕至的那條，旅程也因此變得迴然不同」。由寫下《國際漫遊》呢堆歌曲到將佢哋出版之後，直至今天，李欣芸仍繼續行緊自己嘅音樂旅程，佢嘅音樂成就，大家只要Google一下，就知道一啲都唔簡單。點解當日佢前後用咗10年時間（1995至2005年），先至推出《國際漫遊》﹖點解之後佢唔再推出有主唱嘅個人專輯﹖點解……
呢啲問題，本來我一直想問佢。但寫完呢篇文章後，我好似明白喇。套用《寫在雲端》嘅說法，一切答案，唔係已經寫晒喺《國際漫遊》專輯入面嗎﹖你只要豎起耳朵，深呼吸，用一顆心去聆聽，就會明白所有嘢。今日睇返轉頭，或者呢啲嘢已唔再重要，但將佢哋記錄落嚟，卻非常重要。
